Хэдхэн цагийн дараа Г.Занданшатар Монгол Улсын 34 дэхь Ерөнхий сайд болно. Эх сурвалжуудын хэлж буйгаар яамдын бүтцийг өөрчлөхгүй байх шийдэлд хүрсэн бололтой юм билээ. Өөрөөр хэлбэл Л.Оюун-Эрдэнийн Засгийн газрынхаа танхимдаа байгуулсан  Соёл, спорт, аялал жуулчлал, залуучуудын яам цаашид үргэлжлүүлэн үйл ажиллагаагаа явуулна гэсэн үг.

Л.Оюун-Эрдэнийн засгийн тухайд төр засгийн маш чухал бодлогыг барьдаг хэд хэдэн салбарыг нэг дор бөөгнүүлсэн зөв зүйтэй шийдэл мөн гэдгийг тухайн үед нь улс төр судлаачид ч хэлж байсан. Аялал жуулчлал бол манай улсын эдийн засагт валютын чамгүй нөөцийг татан төвлөрүүлдэг эдийн засгийн чухал салбар. Залуучуудын асуудлын тухайд соёлын салбараас дутуугүй тусгаар тогтнолд ач холбогдол бүхий агуулж тээж байдгийг мартаж болохгүй.

Шинэ сайдын баг өнөөгийн дэлхий дахинд Монгол Улсынхаа оршихуй, даяаршлын буюу шинэ колоничлолын бодлогын орчинд үндэстнийхээ тэсч үлдэх хүчин чадлыг хадгалан үлдэх үүрэг хүлээж ажиллах учиртай. Гэвч Ч.Номингийн баг соёлын бодлогоо ЮНЕСКО-гийн үзэл баримтлалд нийцүүлэх бодлогыг ил шулуухан  тунхаглаж байсан. Хатуухан хэлэхэд, энэ салбарт үндэсний бодлого нэгэнт үгүй болсныг л харуулсан.

Уг нь монгол төрийн соёлын бодлогыг аваад явах, үндэсний язгуур эрх ашгийг ойлгож мэдэрсэн, их гүрнүүдийн соёлын геополитикийн үр дагаврыг ойлгож ухаардаг үндэсний боловсон хүчин монголчууд бидэнд хангалттай бий. Эртний их төр ёст, соёлын язгуур өв уламжлал дээрээ тусгаар тогтнолоо хадгалан оршин тогтнож буй улс орны маань соёлын салбарыг авч явах багийн сайд, багийн боловсрол, замнал чухал гэдгийг эрхбиш мэдэж байгаа байх гэж найдъя даа.