Жил бүрийн энэ өдрийг дэлхий нийтээр хүүхдийн хөдөлмөрт хяналт тавих, тогтолцоог бэхжүүлэх, тэвчишгүй хөдөлмөрийг устгах зэрэг асуудлуудад анхаарал хандуулж, тал бүрийн арга хэмжээг авч хэрэгжүүлдэг .Хүүхдийн хөдөлмөрт хүн бүр санаа тавьж, эрх нь зөрчигдөхөөс урьдчилан сэргийлэх үүргийг ухамсарлах шаардлага ганц энэ өдөр бус үргэлж тулгардаг. Монгол Улс хүүхдийн хөдөлмөртэй холбоотой үндсэн конвенцуудыг соёрхон баталж, хөдөлмөрийн насны доод хязгаарыг 15 нас байхаар тогтоосон. Мөн Монгол Улс 13-14 насны хүүхдийг хөнгөн ажил эрхлэхийг зөвшөөрч, хүүхдэд аюултай ажлын жагсаалтыг баталсан. 

Манай улсад хөдөлмөр эрхэлж буй 5 хүүхэд тутмын 3 нь 5-12 насны хүүхэд байдаг ба 5 хүүхэд тутмын 2 нь аюултай ажил эрхэлдэг гэх судалгаа бий.  Хүүхдүүд ихэвчлэн ус зөөх, түлээ, мод бэлтгэх үйл ажиллагаанд болон хөдөө аж ахуйн салбарт хөдөлмөр эрхэлдэг. Түүнчлэн бүх насны бүлэгт охидтой харьцуулахад хөвгүүд ихээр хүүхдийн хөдөлмөр эрхэлж бөгөөд хөдөлмөр эрхэлж буй хүүхдийн ихэнх нь хөдөө амьдарч байна.

Хүүхдийн аюултай ажил гэж хүүхдийн эрүүл мэнд, аюулгүй байдал, ёс суртахуун, хүмүүжилд сөргөөр нөлөөлөх аюултай шинж чанар бүхий (аюултай орчин, тоног төхөөрөмж, салбар, ажил мэргэжил) аливаа ажил, үйл ажиллагаа юм. Хөвгүүд охидыг бодвол аюултай ажилд илүү их оролцож байна.

Тиймээс та бүхэнд хүүхдийн хөдөлмөрт хяналттай, зохистой хандахыг Хүүхэд, гэр бүлийн хөгжил, хамгааллын ерөнхий газраас уриалж байна.