Улсын дээд шүүхээр Эс, эд, эрхтэн шилжүүлэн суулгах үйл ажиллагааг зохицуулах албаны дарга асан, Төрийн соёрхолт, Гавьяат эмч П.Батчулуун эмчийн гомдлыг хэлэлцэж байна. Шүүх хуралд түүний таван өмгөөлөгч төлөөлөн оролцож байна.

Түүнийг хүний эд эрхтэнийг  зөвшөөрөлгүй авсан үйлдэлд гэм буруутайд тооцон /2025.01.20/ өдөр шүүхээс 2.6 жилийн ял оноосон билээ. Тус хэргийг П.Батчулууны гомдлын дагуу дахин хэлэлцэхээр болж шүүх хуралдааныг өнгөрсөн гуравдугаар сард /2025.03.13/ нийслэлийн Эрүүгийн хэргийн Давж заалдах шатны шүүхэд хэлэлцсэн юм. Давж заалдах шатны шүүх түүний гомдол болон өмгөөлөгчийн хүсэлт зэргийг хэлэлцэж, П.Батчулуунд оноосон 2.6 жилийн ялыг хэвээр үлдээн шийдвэрлэсэн.

Өмгөөлөгч нарын зүгээс хэргийн мөрдөн байцаалтаас эхлээд хяналтын шат хүртэлх ажилласан дарааллаар ярих санал гаргажээ. Харин прокурорын зүгээс хурлын ирц, татгалзах санал байхгүй ч шүүх хуралдааныг хаалттай хийх хүсэлт гаргасан байна. Учир нь Донорын тухай хуулийн 17.3-т донорын эд, эрхтэн шилжүүлсэн хүмүүсийг энэ хэрэгт гэрчээр дуудсан учраас хуулиын дагуу нууцлалыг хадгалах үүрэгтэй байдаг аж. Товчхондоо хүний эмзэг мэдээлэлд эрүүл мэндийн байдал ордог учраас Эрүүгийн хуулийн 34.4.2.1 зааснаар гэрчийн хууль ёсны ашиг сонирхлыг хамгаалах үүднээс шүүх хурлыг хаалттай хийж өгнө үү гэх саналын дагуу хаалттай явуулж байгаа гэсэн үг.

Шүүх бүрэлдэхүүн зөвлөлдөж дараах шийдвэрийг гаргалаа. Донорын тухай хуульд зааснаар энэ хэрэгт яригдах асуудал хүний эмзэг мэдээлэлд хамаарч байна. Эрүүгийн хэрэг хянан шийдвэрлэх тухай хуулийн 34.4.2.1 зааснаар хүний эмзэг мэдээлэлтэй холбоотой асуудлыг хэсэгчилж эсвэл бүрэн хаалттай явуулахаар заасан байна. Хамгийн гол нь хэргийн оролцогч нар нэгдмэл саналтай байгаа учраас шүүх хурлыг бүрэн хаалттай явуулахаар шийдвэрлэлээ. Шүүх хурал үргэлжилж байна. Харин П.Батчулуун эмч одоо Улсын гуравдугаар төв эмнэлэгт хэвтэн эмчлүүлж байгаа юм.