Чингэлтэй, Сүхбаатар дүүргийн 158 га, 2206 нэгж талбайд хэрэгжих анхны жишиг “20 минутын хот” болох Сэлбэ дэд төвийн барилга угсралтын ажил эхэллээ.  Сэлбийн бүтээн байгуулалт III, IV хороолол дээр “Өнөр” хорооллыг нэмсэн дайны том бүтээн байгуулалт болох юм. Өөрөөр хэлбэл нийтдээ 13 мянган айлын үйлчилгээтэй орон сууцны цогц төслийг 24 сарын хугацаанд барихаа төлөвлөжээ.

Энд баригдах орон сууцны хэрэглээний усыг зэс хоолойгоор шийдэж байгаа ба дундын хэрэглээний эрчим хүчийг сэргээгдэх эрчим хүчээр шийдэх аж. Түүнчлэн гадаад хэл, техник, спортын төрөлжсөн хөтөлбөртэй гурван сургуулийг төслийн хүрээнд ашиглалтад оруулж, сургуулийн өмнөх насны боловсролын тухайд таван цэцэрлэг шинээр барих юм байна. Мөн Монгол Улсын циркийг Сэлбэ хотод байгуулах талаар Соёлын яамтай зөвшилцөж, төлөвлөлтөө хийжээ.

Мөн уг байранд орох иргэд ирэх наймдугаар сараас эхлэн захиалгаа өгч болох агаад давхар, байршлаасаа шалтгаалаад үнэ харилцан адилгүй байна гэдгийг Улаанбаатар хотын захирагч онцоллоо.

“Сэлбэ 20 минутын хот” төслийн хүрээнд, 10 мянган өрхийн 113 блок орон сууц, 17 км орчим автозам, 43 км явган зам, 28.9 км дугуйн зам зэрэг төвлөрсөн бүтээн байгуулалтыг бий олгох ажээ. Уг төслийг Хятад улсын "Чайна констракшн" компани гүйцэтгэх ба монгол компани туслан гүйцэтгэгчээр ажиллана. Гэхдээ нийт ажилчдын 60-70 хувь нь монгол ажилчид байх бол үлдсэн ажиллах хүчийг Хятад улсаас авч ирж ажиллуулах ажээ.