Дундговь аймгийн Засаг даргын Тамгын газар, “Нарны хүлэг” морин спорт, уяачдын холбоо хамтран зохион байгуулж буй “Мандалын хурд -2025” хаврын төвийн бүсийн хурдан морины уралдаан Мандалговь хотноо энэ сарын 2, 3-ны өдрүүдэд болж байна.

Нээлтийн ажиллагаанд Дундговь аймгийн Засаг дарга С.Мөнхчулуун, Засаг даргын орлогч Ц.Ариунбаяр, Засаг даргын зөвлөх О.Цолмон, Нарны хүлэг Морин спорт уяачдын холбооны дэд тэргүүн Т.Түвшинтөр, Э.Хөхөөхүү, тэргүүлэгч Ц.Онолбат нар оролцож, Төв халхын дуулалт жүжгийн театрын уран бүтээлчид дуун түрлэг өргөлөө.

Сонгомол дээд насанд Завхан аймгийн Сонгино сумын уяач Нямдоржийн Батбаярын халтар түрүүлэн, Өмнөговь аймгийн Баян-Овоо сумын Аймгийн алдарт уяач Цогнэмэхийн Номин-Эрдэнийн хээр халзан аман хүзүүджээ. Айргийн гуравт Дундговь аймгийн Сайнцагаан сумын уяач Эрдэнэцогтын Дэлгэржаргал, айргийн дөрөвт Дундговь аймгийн Дэлгэрхангай сумын уяач Чимэддаваагийн Базарзаяагийн зээрд халзан, айргийн тавд Дундговь аймгийн Луус сумын Сумын алдарт уяач Эрдэнэбаатарын Баянсангийн хүрэн хурдлав.

Их насанд Өмнөговь аймгийн Баян-Овоо сумын Аймгийн алдарт уяач Батсүхийн Баярсайханы хээр түрүүлж, Дундговь аймгийн Сайнцагаан сумын уяач Данхын Чулуунбаатарын хээр аман хүзүүдсэн бол айргийн гуравт Дундговь аймгийн Өлзийт сумын уяач Сайнхүүгийн Батсүхийн хонгор халзан, айргийн дөрөвт Дундговь аймгийн Өлзийт сумын уяач Баттөмөрийн Тунсагийн хонгор халзан, айргийн тавд Өвөрхангай аймгийн Хужирт сумын уяач Батхүүгийн Ганбатын ухаа тус тус хурдалсан байна.

Соёолон насны түрүү магнайд Төв аймгийн Жаргалант сумын уяач Түмэнбаярын хээр алаг, аман хүзүүд Өмнөговь аймгийн Цогтцэций сумын Аймгийн алдарт уяач Мөнхбаярын Адъяабаатарын зээрд хурдлан, Дундговь аймгийн Сайнцагаан сумын Аймгийн алдарт уяач Цэндсүрэнгийн Онолбатын бор айргийн гуравт, Дундговь аймгийн Өндөршил сумын уяач Сүхбаатарын буурал айргийн дөрөвт, Өмнөговь аймгийн Баян-Овоо сумын Аймгийн алдарт уяач Батсүхийн Баярсайханы хээр айргийн тавд хурдалжээ.

Уралдааныг Түмний эх энтертаймент Б.Ганпүрэв орон даяар шууд дамжуулж байна.