Засгийн газрын өнөөдрийн хуралдаанаас гарсан шийдвэрийн талаар танилцуулах үеэр Цахим хөгжил, харилцаа холбооны яамны Төрийн нарийн бичгийн дарга Б.Болор-Эрдэнэ сэтгүүлчдийн асуултад хариуллаа.

-Таныг “Time” сэтгүүлд төлбөр төлж, өөрийнхөө тухай нийтлүүлсэн гэдэг мэдээлэл яваад байгаа. Энэ үнэн үү?

-Олон улсын хэмжээний том сэтгүүл төлбөр аваад мэдээ гаргахгүй байх гэж бодож байна. Миний гарсан “New Generation Leader” дээр найман сарын турш судалгаа хийсэн гэдэг юм билээ. Манай ангийнхан, багш болон маш олон хүмүүсээс судалгаа аваад, надтай холбогдсон гэдэг мэдээллийг “TIME”-аас өгч байсан. Харин миний хувьд нэгдүгээрт, дэлхийн хэмжээнд Монгол залуу хүнийг онцолж харсан нь, хоёрдугаарт,  Монголын мэдээллийн технологийн салбарыг олон улсын хэвлэл мэдээлэл коверлосон нь сайшаалтай гэж харж байгаа. 

-Таныг бас тэтгэлгээр сураагүй гэх мэдээлэл гарсан. Та үүнийг харсан байх?

-Тэтгэлгээр сурсан тухай захиа болон баримтууд нь бий. Та бүхэн хэрвээ хүсвэл Оксфордын их сургуулийн сайт руу ороод харж болно. Тэнд тэтгэлгээр сурсан хүмүүсийн жагсаалтад миний нэр байгаа. Хэвлэл мэдээллийн байгууллага мэдээллийг “Fact Check” хийдэг байх гэж бодож байна. Англи хэлээр гүүглэдэхэд л гараад ирнэ шүү дээ.