Өчигдөр /2022.04.05/ цахим орчинд ШШГЕГ-ын харьяа цагдан хорих 461 дүгээр хорих ангийн дэд дарга, хурандаа Э.Бямбадоржийн цагдан хоригдож байгаа этгээдэд хүч хэрэглэж буй бичлэг цахим орчинд тархсан.

Энэ талаар ШШГЕГ-ын Хэвлэл мэдээллийн төвийн дарга, хошууч Х.Баясгалангаас тодрууллаа. 

ШШГЕГ-ын харьяа цагдан хорих хаалттай хорих ангийн дэд дарга хоригдсон этгээдэд хүч хэрэглэсэн гэх бичлэг олон нийтийн сүлжээгээр цацагдсан. Тухайн хоригдогчийн хувьд бусдын биед хүч хэрэглэсэн, албан хаагчийн хууль ёсны шаардлагыг хүч хэрэглэн эсэргүүцэж улмаар өөрийнхөө бие эрхтэнд гэмтэл учруулах үйлдлийг гаргасан байна.

Цацагдаад байгаа бичлэгийн хувьд тухайн хоригдогчийн гарсан үйлдлийг таслан зогсоох үеийн бичлэгийн хэсэг байгаа юм. Уг асуудалд прокурорын байгууллагаас шалгалт явуулаад алба хаагч нь тухайн хоригдогч этгээдийн гаргасан үйлдлийг таслан зогсоох явцдаа биеийн хүчийг хэтрүүлэн хэрэглэсэн гэдгийг шалтгалтаар тогтоосон.

Мөн прокурорын байгууллагаас тухайн нөхцөл нь гэмт хэргийн шинжтэй байж болзошгүй гэдэг үүднээс цагдаагийн байгууллагад шилжүүлсэн.

Өнөөдрийн байдлаар Баянгол дүүргийн цагдаагийн газрын хоёрдугаар хэлтэст хэрэг бүртгэлтийн хэрэг нээгээд уг асуудлыг шалгаж байгаа. ШШГЕГ-ын зүгээс дотоод албан шалгалтын явуулж байна. Шалгалтаар тухайн алба хаагчийн гаргасан үйлдэлд тодорхой хариуцлагыг тооцно.