Дэлхийн гэр бүлийн өдөр өнөөдөр тохиож байна. 1994 оноос эхлэн тавдугаар capын 15 өдрийг “Гэр бүлийн өдөр” болгон тэмдэглэсээр ирсэн байдаг. Тэгвэл энэ өдөр Сүхбаатарын талбайд "Хүүхдэд хайртай хүн бол..." НҮТББ-аас “Хүүхдэд хайртай хүн бол…” гэр бүлийн үндэсний өдөрлөгийг зохион байгууллаа.

Өдөрлөгийг Монголын сэтгэл судлаачдын нийгэмлэг, Хэрэглээний сэтгэл судлалын хүрээлэн, Дэлхийн зөн, Сүхбаатар дүүргийн Хүүхэд, гэр бүл хөгжлийн хэлтэс, Шүдний эмнэлгүүдийн холбоо зэрэг байгууллагууд хамтран зохион байгуулж, 50 орчим гэр бүл, хүүхдийн сэтгэл зүйч, шүдний эмч нар оролцож, хүүхэд, эцэг эхчүүдэд үнэ төлбөргүй зөвлөгөө өгөв. Мөн Нийслэлийн Хан-Уул дүүргийн 218 дүгээр цэцэрлэг, "Хүүхэлдэйн урлагийн хөгжил" ТББ-ын Рома хүүхэлдэйн театр хүүхэд багачууддаа хүүхэлдэйн жүжгээ үзүүлж, үлгэрийн ертөнцөөр аялуулсан юм.

Нийтдээ 40 гаруй хүүхдийн төлөө үйл ажиллагаа явуулдаг төр, төрийн бус байгууллагын асраас гадна тэврэлтийн өртөө, хайрлах өртөө, цахим соёлын өртөө, оюуны элч өртөө, уламжлалт монгол өртөө, бүтээлч өртөө, Хөх монгол иргүүн өртөө зэрэг долоон өртөөгөөр эцэг эхчүүд аялж, хэрэгтэй мэдээллээ авч байлаа.

Үүний зэрэгцээ худалдаа үйлчилгээний байгууллагууд, үндэсний брэнд бүтээгчид оролцож, Төв талбай дээр ирсэн эцэг эх, хүүхэд багачуудад үйлчилж байв.

Өглөө 10 цагаас эхэлсэн энэхүү өдөрлөг хөл хөдөлгөөн ихтэй үргэлжилж, ялангуяа хүүхдийн шүдний эмнэлэг, номын дэлгүүр, сэтгэл зүйчдийн асар энэ өдөр хамгийн их ачаалалтай байсан юм. Мөн мөстэй цай, амттан, хоолны асрууд ч урт дараалалтай байв. 

Түүнчлэн асрууд дундаас "Нарны охид" ТББ-ын өсвөр насны охидын эрхийг хамгаалах төслийн танилцуулга үнэхээр "хайр хүргэм" байлаа. Учир нь, 6-7 ангийн сурагч охид тун ч өөртөө итгэлтэйгээр охидын эрхийн талаар ярьж, зорьж ирсэн хүмүүст мэдээллээ эвлэгхэн өгчихөж байв. Тэд ЕБС-иуд, дүүргүүдийн Хүүхэд гэр бүл, хүүхэд залуучуудын хөгжлийн хэлтэстэй хамтран ахлах ангийн сурагчдад нөхөн үржихүйн эрүүл мэнд болон зүрх сэтгэлийн боловсрол зэрэг сэдвээр сургалт, уулзалт зохион байгуулдаг байна.

Анх удаагаа зохион байгуулагдсан "Хүүхдэд хайртай хүн бол..." гэр бүлийн үндэсний өдөрлөгт бүхий л насны эцэг эхчүүд өргөнөөр оролцож, нэг өдрийг хүүхэдтэйгээ хамт гэр бүл, хүүхдийн хүмүүжил, тэдний сэтгэл зүй, эрүүл мэндийн боловсролд зориулж өнгөрүүлсэн нь энэ өдрийн онцлох үйл явдал байлаа.