Хятадын Хөдөө аж ахуй, орон нутгийн хэргийн сайд асан Тан Рэнжиан авлигын хэргээр Жилин мужийн шүүхээс цаазын ял авчээ. Тэрбээр 2007-2024 оны хооронд янз бүрийн албан тушаалд байх хугацаандаа нийт 268 сая юань буюу 37.6 сая ам.доллартай дүйцэх бэлэн мөнгө, эд хөрөнгийн авлига авсан нь тогтоогдсон байна.  Чанчунь хотын дунд шатны ардын шүүх үйлдсэн гэмт хэргээ хүлээсэн гэдэг үндэслэлээр түүний цаазын ялыг хоёр жилээр хойшлуулжээ.

Тан Рэнжианыг залилангийн гэмт хэрэгтэй тэмцэх газар шалгаж, албан тушааалаас нь огцруулснаас зургаан сарын дараа буюу 2024 оны арваннэгдүгээр сард түүнийг Хятадын Коммунист намаас хөөжээ. Түүнийг Батлан хамгаалахын сайд асан Ли Шанфу, Вэй Фэнхэ нарын дараагаар мөрдөн шалгаж эхэлсэн. Гэхдээ мөрдөн шалгах ажиллагаа ер бусын хурдан үргэлжлээд дуусчээ.

Тан Рэнжиан 2017-2020 онд Гансу мужийн захирагчаар ажиллаж байв. Үүнийхээ дараа Хөдөө аж ахуй, орон нутгийн хэргийн сайдаар томилогджээ.

Дашрамд дурдахад, Хятадын дарга Ши Жиньпин 2020 онд дотоодын аюулгүй байдлын аппаратыг цэвэрлэх кампанит ажлыг эхлүүлсэн. Тэрбээр энэ оны нэгдүгээр сард Хятадын Коммунист намын хамгийн том аюул бол авлига гэдгийг тунхагласан юм.