Италид болж буй өвлийн Олимпын наадмын анхны алтан медалийг Швейцарын уулын цанын тамирчин өдгөө 24 настай Франьо фон Алльмен хурдан уруудалтын эрэгтэйчүүдийн төрөлд түрүүлснээр хүртлээ.  Түүний араас Швед, Италийн тамирчид алтан медаль хүртсэн байна.

Франьо фон Алльмен уулын цанын хамгийн хүнд замуудын нэгд тооцогддог “Стельвио” зам дээр цагт 145 км хурдалснаар 1 минут 51.61 секундийн амжилт үзүүлж, Италийн тамирчид болох Жованни Франзони, Доминик Парис нарыг ардаа үлдээжээ.

Бямба гарагт эмэгтэйчүүдийн скиатлон төрөлд Шведийн тамирчин Фрида Карлссон алтан медаль хүртэж, тус наадмын хоёр дахь алтан медалийн эзэн болжээ. Мөнгөн медалийг түүний нутаг нэгт тамирчин Эбба Андерссон, хүрэл медалийг Норвегийн скиатлонч Хейди Венг хүртсэн байна.

Олимпын наадмыг зохион байгуулагч улс болох Италийн анхны алтан медалийг Франческа Лоллобрижида авчирлаа. Тэрбээр төрсөн өдрөөрөө уралдсан бөгөөд зөвхөн алтан медаль хүртээд зогсохгүй, эмэгтэйчүүдийн 3000 метрийн тэшүүрийн уралдаанд 3 минут 54.28 секундийн амжилтаар олимпын шинэ рекорд тогтоожээ.

Мөнгөн медалийг Норвегийн тэшүүрчин Рагне Виклунд, хүрэл медалийг Канадын тамирчин Валери Мальте хүртсэн байна.

Лоллобрижидагийн хувьд тэрбээр олимпын наадмаас анх удаа алтан медаль хүртэж байгаа бөгөөд 2022 оны Бээжингийн Олимпоос хүртсэн мөнгө, хүрлийн дараах гурав дахь олимпын медаль юм. Мөн эмэгтэйчүүдийн тэшүүрийн спортын төрөлд Итали улсын хүртсэн анхны алтан медаль гэдгийг Олон улсын олимпын хороо (МОК) мэдээлжээ.

Олон улсын олимпын хорооноос мэдээлснээр, төвийг сахисан тамирчны статустай оролцож буй Оросын тэшүүрчин Ксения Коржова эмэгтэйчүүдийн 3000 метрийн зайд 12-р байр, Беларусийн тамирчин Марина Зуева 15-р байрт оржээ.

Наадмын эхний өдөр нийт таван багц медалийн эзэд тодорсон байна.

Цанын трамплинаас харайх төрөлд Норвегийн тамирчин Анна Одине Стрём  алтан медаль хүртлээ. Сүүлийн харайлтаараа тэрбээр 130.4 оноо авч, нийлбэр дүнгээрээ 267.3 оноо цуглуулсан байна. Мөнгөн медалийг Словакийн тамирчин Ника Превц (266.2), хүрэл медалийг Японы тамирчин Нодзоми Маруяма (261.8) хүртжээ.

Эрэгтэйчүүдийн сноубордын тэмцээнд Япон улс хоёр медаль хүртлээ. 179.5 оноо авсан Кира Кимура алтан медаль хүртсэн бол Рема Кимата мөнгөн медалийн эзэн болов. Харин биг-эйр төрлийн аварга, БНХАУ-ын тамирчин Йимин Су энэ удаад хүрэл медаль хүртжээ.

Бямба гарагт керлингийн урьдчилсан шат, эмэгтэйчүүдийн хоккейн хэсгийн тоглолтууд, мөн эрэгтэйчүүдийн чарганы уралдаан болж өнгөрлөө.

Эмэгтэйчүүдийн хоккейн тэмцээнд Шведийн шигшээ баг Италийн багийг 6:1-ийн харьцаатай илт давуу хожлоо. Германы шигшээ баг Японыг 5:2-оор буулган авч Миланд болж буй Олимпод анхны хожлоо авлаа. Өмнө нь тэд Шведэд ялагдсан юм. Харин АНУ-ын эмэгтэйчүүдийн шигшээ баг Финландыг 5:0-ээр илт давуу ялжээ.

Өвлийн XXV Олимпын наадам Италийн Милан, Кортина-д’Ампеццо хотуудад үргэлжилж байгаа бөгөөд ням гарагт найман багц медалын эзэд тодорно.