АНУ-ын Ерөнхийлөгч Дональд Трамп Украины Ерөнхийлөгч Владимир Зеленскийтэй хийх уулзалтын өмнө мэдэгдэл хийж, Украины дайныг зогсоохын тулд "Украин НАТО-д элсэхгүй байх", "Крымийг Оросын хяналтад өгөхийг хүлээн зөвшөөрөх" хоёр гол шаардлага тавьж буйгаа мэдэгдсэн.   Ингэснээр “дайн даруй дуусах боломжтой” гэж АНУ-ын Ерөнхийлөгч үзэж байгаа аж.

Гэвч Украины Ерөнхийлөгч Владимир Зеленский “Орос эхлүүлсэн дайнаа өөрөө дуусгах ёстой” хэмээн мэдэгдэж, газар нутгийн бүрэн бүтэн байдал, тусгаар тогтнолоосоо ямар ч нөхцөлд ухрахгүй гэдгээ онцолсон.

Европын удирдагчид ч Украины талд байр сууриа илэрхийлээд, Трампын саналд эргэлзэж байгаагаа нуусангүй. Өнөө орой Вашингтонд болох уулзалтад энэ асуудал гол сэдэв болох төлөвтэй байна гэж аижглагчид хэлж байна..

Харин маргааш нь буюу 19-нд АНУ-ын Ерөнхийлөгч Дональд Трамп Европын Комиссын дарга Урсула фон дер Ляйен, Их Британийн Ерөнхий сайд Кэйр Стармер, Германы Канцлер Фридрих Мерц, Францын Ерөнхийлөгч Эммануэль Макрон, Финляндын Ерөнхийлөгч Александр Стубб, НАТО-гийн Ерөнхий нарийн бичгийн дарга  Марк Рутте болон Украины Ерөнхийлөгч Володимир Зеленський нартай хийсэн уулзалтын дундуур ОХУ-ын Ерөнхийлөгч Владимир Путинтэй утсаар ярилцаж, ойролцоогоор 40 минут үргэлжилжээ.

ОХУ-ын Ерөнхийлөгчийн туслах Юрий Ушаковын мэдэгдсэнээр, яриа илэн далангүй, бүтээлч болсон гэж тодорхойлжээ. Трамп утсаар ярьж байхдаа Украины Ерөнхийлөгч Владимир Зеленский болон Европын өндөр түвшний удирдагчидтай хийсэн уулзалтын талаар Путинд мэдээлсэн байна.

Путин, Трамп нар Орос, Украины төлөөлөгчдийн хооронд шууд хэлэлцээ хийхийг дэмжиж байгаагаа илэрхийлсэн бөгөөд энэ хэлэлцээний түвшинг дээшлүүлэх талаар талууд судлан ярилцжээ. Мөн талууд Украины болон олон улсын бусад асуудал, мөн хоёр талын хэлэлцэх халуун цэгүүдийн талаар үргэлжлэн анхаарлаа хандуулахаар тохиролцсон байна.  Утсаар ярилцсаны дараа Трамп гурвалсан уулзалт хийхээр төлөвлөж байгаагаа мэдэгдсэн бөгөөд оролцогчид нь Трамп, Путин, Зеленский нар байх юм. Гурвалсан уулзалтын байршил одоогоор хараахан тогтоогдоогүй байна.

Мөн өдөр Трамп Цагаан ордонд Европын удирдагчидтай олон талт уулзалт хийж, “АНУ-аас зохицуулах Украины аюулгүй байдлын баталгааны төлөвлөгөө”-нд анхаарлаа хандуулсан гэж мэдээлжээ.  Тус уулзалт нь Трамп, Зеленский нарын өмнөх уулзалтаас үргэлжлэн, Орос, Украины хоорондын шууд хэлэлцээний боломжийг эргэн нээж байгаа ч, одоогоор тодорхой шийдэл гараагүй байгаа нь олон улсын дипломат хүрээний анхаарлыг татаж байна.  Утсаар ярилцсан нь хоёр талын харилцааг түргэн шуурхай сэргээх алхам болж, энхийн хэлэлцээний шинэ шатны боломжийг бий болгохоор байна.