АНУ-ын Ерөнхийлөгч Д.Трампын засаг захиргаатай үүссэн маргааныг шийдвэрлэхийн тулд Харвардын их сургууль Цагаан ордноос тавьж буй шаардлагыг хүлээн авч, 500 сая хүртэлх ам.доллар төлөхөд бэлэн байгаагаа мэдэгдсэн тухай “The New York Times” сонинд эх сурвалжуудыг эш татан бичжээ. 

Тус сонинд мэдээлснээр “Засгийн газарт шууд төлбөр төлөх саналыг Харвард дурамжхан зөвшөөрч байгаа боловч талууд санхүүгийн нарийн ширийн нөхцөлүүдийг хэлэлцсээр байгаа аж”. "Трампын засаг захиргаа болон тус их сургуулийн төлөөлөгчид хэзээ тохиролцоонд хүрэх нь одоогоор тодорхойгүй байна. Харвардын санхүүжилтийг танаж, гадаад оюутнуудыг элсүүлэхийг хориглосон Засгийн газрын шийдвэрийн эсрэг шүүхэд гаргаад байгаа нэхэмжлэлтэй холбоотойгоор Аливаа яриа хэлэлцээг  явуулахыг Харвардын их сургуулийн талаас шаардах төлөвтэй байна гэж эх сурвалжууд ярьсан байна. 

Харвард болон бусад хэд хэдэн их сургууль төрөөс санхүүжилт авсныхаа хариуд Колумбын их сургуультай өмнө нь байгуулсан гэрээтэй адил их хэмжээний торгууль төлөх ёстой гэж АНУ-ын засаг захиргаа өнгөрсөн долоо хоногт мэдэгджээ. 

Цагаан ордноос өмнө нь АНУ-ын их сургуулиудад хандан еврей гаралтай оюутнуудыг хамгаалахыг шаардаж, эс бөгөөс санхүүжилтийг нь танана гэж мэдэгдсэн юм. Энэ нь зарим их сургуулиудад Палестиныг дэмжигчдын ажиллагаа өрнөсөнтэй холбоотой юм.

Харвардын удирдлагууд бодлогодоо өөрчлөлт оруул гэсэн засгийн газрын шаардлагыг хүлээж авахаас татгалзсаны дараа тус  их сургуульд төрөөс олгодог 2.2 тэрбум долларын санхүүжилтийг царцаасан гэдгийг АНУ-ын Боловсролын яам өнгөрсөн дөрөвдүгээр сард мэдээлсэн билээ.