Харвардын их сургуулийн нийт оюутны 27 хувийг гадаад оюутан бүрдүүлдэг. Гэтэл АНУ-ын Ерөнхийлөгч Дональд Трамп Дональд Трамп Харвардын их сургуульд гадаад оюутнуудыг сургахгүй хэмээн мэдэгдэж, шийдвэр гаргасан тухай Нью-Йорк Таймс сонин мэдээлсэн. Тодруулбал, АНУ-ын Дотоодын аюулгүй байдлын сайд Кристи Ноэм тус их сургуульд олгосон гадаадын оюутан сургах зөвшөөрлийг нэн даруй цуцлахыг тушаасан бөгөөд “хүчирхийлэл, еврейчүүдийг үзэн ядах үзлийг өөгшүүлсэн”, мөн "Хятадын Коммунист намтай хамтран ажилласан” гэж Харвардын их сургуулийг буруутгасан билээ.

Ингэснээр тус их сургуулиас АНУ-д нэвтрэх оюутны визийг олгоход шаардлагатай бичиг баримтуудыг гадаадын оюутнуудад олгох боломжгүй болно. Түүнээс гадна Харвардад одоо сурч буй гадаадын оюутнууд өөр их сургуульд шилжин суралцах ёстой бөгөөд эс бөгөөс АНУ-д оршин суух эрхгүй болж байгаа юм. Харин Харвардын их сургуулийн захиргаанаас Трампын засгийн газрын шийдвэрийг “хууль бус, өш санасан шинжтэй” гэж тодорхойлсон билээ.

Түүгээр ч барахгүй энэ оны дөрөвдүгээр сарын дундуур холбооны төсвөөс тус сургуульд олгодог 2,2 тэрбум долларын санхүүжилтийг зогсоожээ. Түүнчлэн Америкийн үнэт зүйлсэд дайсагнан ханддаг гадаадын оюутнуудыг хүлээн авахаас татгалзах, еврейчүүдийг үзэн ядах үзэл болон үзэн ядалтын бусад хэлбэрийг өөгшүүлсэн агуулгууд сургалтын хөтөлбөрт байгаа эсэхэд хөндлөнгийн шинжээчдээр дүгнэлт хийлгэ хэмээн шаардсан байна. Харин Харвардын их сургуулийн захиргаа шүүхэд хандсан агаад тус шүүх хурал мягмар гарагт буюу өнөөдөр болохоор товлогдсон.

Гэтэл Дональд Трампын хувьд даваа гарагт буюу өчигдөр дахин Харвардын их сургуулийн 3 тэрбум долларын санхүүжилтийг танахаа мэдэгджээ. Учир нь тус сургуулийн оюутнууд Израилын эсрэг жагсаалыг зохион байгуулж, Палестиныг дэмжсээр буй нь антисемитизм буюу еврейн эсрэг үзлийг дэлгэрүүлж байгаа хэлбэр мөн гэнэ. Тэрбээр "Еврейн эсрэг үзэлтэй Харвардын их сургуулиас гурван тэрбум долларын санхүүжилтийг зогсоож, оронд нь худалдааны сургуульд өгнө.  Энэ бол АНУ-д оруулах том хөрөнгө оруулалт юм” хэмээжээ.