ОХУ-ын сөрөг хүчний тэмцэгч төдийгүй Ерөнхийлөгч Владимир Путин, Кремлийг хурцаар шүүмжилдэг нэгэн байсан Алексей Навальныйн мэндэлсэн өдөр өчигдөр буюу зургадугаар сарын 4-ний өдөр тохиожээ. Навальный хэрэв амьд сэрүүн байсан бол өчигдөр 48 нас хүрэх байсан юм.

Навальныйн мэндэлсэн өдрийг ардчилсан үзэл баримтлалтай барууны орнуудад тэмдэглэсэн байна. Навальныйн бэлэвсэн эхнэр Юлия Навальная болон Навальныйн ойрын хүрээллийнхэн ХБНГУ-ын нийслэл Берлин хотын сүмд дурсгал хүндэтгэлийн арга хэмжээ зохион байгуулжээ.

Мөн Ослогийн эрх чөлөөний форумын үеэр Навальный агсанд Масекогийн нэрэмжит шударга ёсны шагналыг олгож, эхнэр Юлияд нь гардуулжээ. Өмнөд Африкийн Эсватинийн хаант улсын свази үндэстэй хүний эрхийн төлөө тэмцэгч хуульч өмгөөлөгч Тулани Масеко жилийн өмнө гэрийнхээ цонхоор буудуулж гэр бүлийнхээ өмнө харамсалтайгаар амиа алдсан юм. Түүнийг алагдсаны дараа нэрэмжит шударга ёсны шагналыг нь олгож байхаар тогтож анхны шагналыг нь ийнхүү Навальный агсанд гардуулсан байна. Тулани Масекогийн бэлэвсэн эхнэр Танеле Масеко Юлия Навальнаяд шагналыг нь биечлэн өгчээ.

Мөн ОХУ-ын хэд хэдэн томоохон хотуудад Навальныйн дурсгалыг хүндэтгэж дэмжигчид нь хөшөө дурсгалд цэцэг өргөсөн байна. Навальныйг Оросын нийслэл Москва хотын өмнөд хэсэгт байдаг Борисовское оршуулгын газарт нутаглуулсан. Ээж Людмила болон хэдэн зуун дэмжигчид нь тус оршуулгын газарт хүндэтгэл үзүүлж цэцэг өргөжээ.

Алексей Навальный өрнөд Сибирийн Ямало-Ненец дэх хорих газарт өнгөрөгч хоёрдугаар сарын 16-ны өдөр таалал төгссөн юм. Гэр бүлийнхэн нь шарилыг нь таалал төгссөнөөс хойш найм хоногийн дараа хүлээж авч оршуулсан. Түүний бэлэвсэн эхнэр Юлия Оросын Засгийн газар, тэр дундаа Ерөнхийлөгч Путин нөхрийг нь алсан гэж буруутгасаар байгаа юм.

Хорих газрын мэдээнд дурдсанаар Алексей хэсэг алхсаныхаа дараа бие нь тавгүйтэж эхлээд удалгүй нас барсан бөгөөд эрх баригчид түүний үхэлд ямар нэгэн байдлаар холбоогүй гэсэн байр сууриа хамгаалсаар ирсэн. Гэвч Алексейн үхлийн шалтгаан өнгөрсөн дөрвөн сарын турш тодорхой болоогүй хэвээр байна.