Монгол Улсын Шадар сайд С.Амарсайханыг огцрох ёстой хэмээн сэтгүүлч Т.Шинэбаяр өнөөдөр /2024.04.09/ Үндэсний мэдээллийн төвд хэвлэлийн бага хурал хийлээ. 

Тэрээр "Он гарсаар онцгой байдлын дөрвөн алба хаагч харамсалтайгаар амь насаа алдлаа. Эмгэнэл илэрхийлэхдээ араас нь хоёр өрөө орон сууц өгдөг. Монгол хүний амь нас ердөө байрны үнэтэй болчихсон юм уу. Ард нь өнчирч үлдэж байгаа хүүхдүүд яах вэ. Үлдэж байгаа таван хүүхдийг хэн тэжээх вэ? Өнөөдөр онцгой байдлын салбар хамгийн ядуу, ажиллаж буй залуус нь хамгийн бага цалин авдаг. Алба хаагчдад нь олигтой ч усны гутал байдаггүйг өнгөрсөн зуны үерээр харсан. Гэтэл энэ салбарыг хариуцаад ажиллаж байгаа сайд нь төрөөс төрсөн тэрбумтан, олигархи. 10 жилийн өмнө шадар сайд С.Амарсайханы үл хөдлөх хөрөнгийн үнэлгээ 10 тэрбум байсан. Түүний хариуцсан салбар нь үнэхээр өрөвдөлтэй байгаа учраас огцруулахыг шаардаж байна. Сайнбуянгийн хүүхдүүдэд Монголчууд би ямар өртэй юм бэ" хэмээн С.Амарсайхан сайдыг огцорхыг шаардаж байгаагаа илэрхийллээ. 

Мөн Онцгой байдлын албанд дарангуйлал их байдаг учир алба хаагчид дотоод асуудлаа ил гаргаж ярьж чадахгүй байна. ОБЕГ-т ажилладаг н.Батболд хурандаа өөрийгөө Оросод сургууль төгссөн тагнуулч учраас бүх алба хаагчдаа юу хийж, ярьж байгааг мэдэж байдаг гэж дарамталдаг. Болохгүй, бүтэхгүй байгаа бүхнийхээ төлөө дуугарах гэхээр дарга нарынхаа дарамтнаас айгаад дуугарч чадахгүй байна гэлээ.