ТООНООРОО ОРУУЛЖ ИРЭЭД ХААЛГААРАА ӨШИГЛӨН ХӨӨВ.

Тооноор орогч хочтой УИХ-ын Э.Болормаа орон нутгийн сонгуулиар Ховд аймагт МАН-ын тэргүүлэн оролцсон ч өвдөг шороодон, нутгийнханы ярьдагаар шөнө дунд хам хум зугтаасан гэх.

Э.Болормаа гишүүн цаашид Ховд аймгийн МАН-ын даргаар үргэлжлүүлэн ажиллах боломжгүй болсон тул намын даргаа дараагийн хүндээ шилжүүлэн өгөх нь ойлгомжтой. Тэгвэл Ховд аймагт эдгээр өдрүүдэд МАН-ын даргын сунгаа эхэлж, горилогчид гараанаас гарч барианд орохоор хов хорыг хутгаж, холио бантангаа зуураад эхэлжээ.

Тодруулбал, энэ удаад зургаан горилогч өрсөлдөхөөр тодорчээ. Баяраагийн Болорцэцэг, Дангаагийн Авирмэд, Гомбоогийн Пүрэвганди, Маамуугийн Ганзориг, Тогтохын Жаргалсайхан, Ширэндэвийн Батжаргал, нар өрсөлдөх аж.

Энэ дунд С.Бямбацогт сайдын нагац ах Маамуугийн Ганзориг хүртэл багтаж. Угаас үүнийг гайхах ч асуудал биш. Хэзээнээс С.Бямбацогт сайдын дур хүслээр Ховд аймгийн МАН-ын даргыг томилж, засаглаж байсныг сануулахад илүүдэхгүй биз.

Ер нь өнгөрсөн хугацаанд Ховд аймгийн МАН-ын дарга, Засаг дарга нь ч тэр тогтворгүй байсан шалтгаан нөгөө л “яндан” хочит С.Бямбацогт сайд. Цэнд-Аюуш, Галсандондог, Б.Дүгэржав, Э.Болормаа гээд үе үеийн халаа сэлгээ түүний хүслээр болж байлаа. Ховдчуудыг арчаагүй, анхиагүй, ажилгүй, архичин, авлигачин гээд тооноор Э.Болормааг оруулж ирсэн хүн мөн л С.Бямбацогт сайд. Э.Болормааг Ховд руу дэглэм тогтоолгохоор явуулсан нь тэрээр Зам тээврийн сайд болох шуналаас үүдэлтэй. Тохироо ч амжилттай болж Э.Болормаа Ховд аймаг руу, харин С.Бямбацогт Зам тээврийн сайд болсон. Гэхдээ хэзээнээс л хажуудах аа хавирч, ар нуруунаас нь хутгалж сурсан зан нь орон нутгийн сонгуулиар гарч АН-ыг тэтгэж, дэмнээд ялалт байгуулчихсан. Ингээд өөрөө тооноор оруулж ирсэн Э.Болормаагаа хаалгаараа өшиглөөд хөөчихөж байгаа юм. Угтаа бол өөрийн нагац ах М.Ганзоригоо Ховд аймгийн МАН-ын даргаар томилохоор эртнээс төлөвлөж, төлөвлөгөөний дагуу Э.Болормаа гишүүнийг замаасаа зайлуулсан нь энэ. 

ХОВД АЙМАГТ ХААН МЭТ ЭРХ ДАРХТАЙ, ҮНЭНЧ ТАГНУУЛ М.ГАНЗОРИГИЙГ АЛТАН ГАДАС ОДОНГООР ШАГНАСАН Ч ЭДҮГЭЭ МАН-ЫН ДАРГЫН АЛБАН ТУШААЛААР ДАХИН УРАМШУУЛАХААР УЛАЙРЧ БАЙНА.

Одоо түүний дараагийн нүүдэл өөрийн нагац ах, “Нью прогресс” группийн охин компани “Ховдын өргөө” ХХК-ийн захирал Маамуугийн Ганзоригийг Ховд аймгийн МАН-ын дарга болгох. Ингэж чадвал Ховд аймгийг бүхэлд нь атгандаа оруулж, жинхэнээсээ хаан ямар байдгийг яаруу тодоор харуулах хүсэл, шуналынх нь бах тав нь бүрэн ханана.

М.Ганзоригийн хувьд С.Бямбацогтынхоо хайр, хишгээр тендерийг баруун солгойгүй эзэгнэж, Хөгжлийн банкнаас хүртэл зээл авч бужигнуулж яваа будлиантай эр. Түүнд ганцхан "Ховдын өргөө" компани байдаггүй бөгөөд Хөгжлийн банкнаас зээл авсан гэдгээр анх олон нийтэд танил болсон, Ховд цементийн үйлдвэрийн “Вестерн Холд” ХХК, эхнэр Гомбожавын Цэрэнхандын эзэмшлийн  “Тэгш стандарт” ХХК зэрэг компаниудаар дамжуулан тендерийн мөнгөөр гараа угаагаад гаршчихсан. Мэдээж энэ бүхний ард С.Бямбацогт байгааг хэлвэл илүүдэх биз. Хүрээний бузрыг ухвал далай гэдэг шиг нагац, зээ нарын хуйвалдааныг сөхөж ухаад, сийрүүлэн бичихэд өдгөө Аудитын газрын дарга Д.Загджав, УИХ-ын гишүүн асан, бригадын генерал Ц.Сэргэлэн гэх мэтээр хамаатан, хамсаатаад дуусаж өгдөггүй солонгос сериал шиг урт болно.

ҮРГЭЛЖЛЭЛ БИЙ...