Сармагчны цэцэг хэмээх халдварт вирусийн тархалт нэмэгдэж, дэлхийн 12 оронд бүртгэгдсэн талаар ДЭМБ-аас мэдээллээ. Тодруулбал, Их Британи, Испани, Португал, Герман, Бельги, Франц, Нидерланд, Итали, Швед зэрэг Европын улсуудад болон АНУ, Канад, Австралид халдвар авсан нь батлагдсан байна. Энэ асуудлаар ДЭМБ-ын Европын бүсийн захирал Ханс Клюге "Зуны улирал эхэлж, олон нийтийн цугларалт, баяр наадам, үдэшлэг болж байгаа энэ үед халдварын тархалт хурдасч магадгүй" гэж анхааруулав.

Харин Их Британийн Үндэсний эрүүл мэндийн албаны мэдээлснээр уг өвчин нь ихэвчлэн хөнгөн хэлбэрийн вирусийн гаралтай ховор халдвар бөгөөд ихэнх хүмүүс хэдхэн долоо хоногийн дотор эдгэрдэг ажээ. Мөн вирус нь хүмүүс хооронд амархан тархдаггүй бөгөөд олон нийтэд үзүүлэх эрсдэл маш бага юм байна.

Сармагчны цэцэг хэмээх энэхүү өвчин нь Poxviridae овгийн Orthopoxvirus төрөлд багтдаг сармагчны вирусээр үүсгэгддэг, цагаан цэцэг өвчинтэй төстэй боловч хүндрэл багатай өвчин ажээ. 1980 онд дэлхийд дахинд цагаан цэцэг өвчнийг устгах үед ч сармагчны цэцэг өвчин нь баруун Африкийн орнуудад бүртгэгдэж байсан, халуун орны ширэнгэн ойд тархсан зоонозын өвчин юм байна.

Уг өвчин нь ихэвчлэн халуурах, тууралт гарах, тунгалгийн зангилаа томрох зэрэг эмнэлзүйн шинж тэмдэг илэрч, 2-4 долоо хоног үргэлжилдэг бөгөөд нас баралтын хувь 3-6 байна. Сармагчны цэцэг өвчин нь өвчтэй хүн, амьтантай ойр харьцах үед дуслаар эсвэл вирусээр бохирдсон эд зүйлсээр дамжин халдварладаг. 

Одоогоор уг өвчний лабораториор батлагдсан 80 гаруй тохиолдол байгаа ба 50 гаруй тохиолдлыг судалж байна. Тандалт судалгаа өргөжихийн хэрээр илүү олон тохиолдол бүртгэгдэх төлөвтэй байна. ДЭМБ өвчлөл гарсан улс орнууд болон бусад улстай хамтран ажиллаж, өртөж болзошгүй хүмүүсийг олж, илрүүлэх, тандалт хийх, хариу арга хэмжээ авах талаар зөвлөгөө өгөхөөр ажиллаж байна.

Өвчилсөн хүмүүсийг гутаан доромжлохыг хүлээн зөвшөөрөхгүй бөгөөд эдгээр хүмүүс тусламж хүсэхээс татгалзаж, халдварыг нуун дарагдуулах нь дэгдэлтийг зогсооход саад учруулж болзошгүй гэж ДЭМБ-аас анхаарууллаа.

САРМАГЧНЫ ЦЭЦЭГ ӨВЧИНД САНАА ЗОВОХ УУ,  ҮЛ ТООМСОРЛОХ УУ?

Тэгвэл ийм гарчигтай нийтлэлийг BBC-ийн Эрүүл мэнд, шинжлэх ухааны сэтгүүлч Жэймс Галлахерын бичжээ. Түүний нийтлэлд анхаарлаа хандуулна уу.

Хэрэв та Ковидын тахал өвчнөөр шаналж байгаа бол уучлаарай, дахин өөр вирустай тэмцэх шаардлагатай болоод байна. Энэ удаад сармагчны цэцэг өвчин бөгөөд Их Британи зэрэг 12 улсад дэгдэж, төсөөлөөгүй 80 орчим тохиолдол бүртгэгдсэн байна.

Тэгэхээр одоо яах вэ? Санаа зовох уу эсвэл үл тоомсорлох уу?

Энэ удаад дэгдсэн сармагчны цэцэг өвчин ер бусын бөгөөд урьд өмнө байгаагүй вирусээр үүсгэгдсэн нь мэргэшсэн эрдэмтдийг гайхшруулж байна. Учир нь уг өвчний вирус зан төлөвөө өөрчилж, ковид шиг тааварлахад бэрх байгаа юм.

Өнөөг хүртэл сармагчны өвчнийг урьдчилан таамаглах боломжтой байсан.

Вирусийн байгалийн эх үүсвэр нь зэрлэг амьтад бөгөөд тэднийг сармагчин гэхээсээ илүү мэрэгч амьтад гэж үздэг. Баруун болон Төв Африкийн ширэнгэн ойд хэн нэгэн халдвар авсан амьтантай харьцаж, улмаар вирусийн халдвар авдаг. Халдвар авсан хүний арьсаар тууралт гарч, цэврүүтэж, дараа нь хамуутай төстэй болно.

Цөөн тооны тохиолдол өмнө нь дэлхийн бусад оронд, тэр дундаа Их Британид гарч байсан. Харин одоо Баруун болон Төв Африктай холбоогүй хүмүүст вирус анх удаа илэрч байна. Хүмүүс хаанаас, хэнээс халдвар авч байгаа нь одоогоор тодорхойгүй байна.

Сармагчны цэцэг нь мөн бэлгийн харьцааны үед халдварладаг бөгөөд бэлэг эрхтний ойр орчимд тууралт гардаг.

Халдварт өртсөн хүмүүсийн ихэнх нь гей, бисексуал залуус юм.

Оксфордын их сургуулийн Тахал өвчний шинжлэх ухааны хүрээлэнгийн захирал профессор Питер Хорби "Бид маш шинэ нөхцөл байдалд байна. Энэ бол гэнэтийн бас санаа зовоосон асуудал" гэв.

Тэрбээр энэ нь "Ковидын шинэ хувилбар биш" гэж хэлж байгаа ч энэ вирусийг газар авахгүйн тулд "Бид үйлдэл хийх хэрэгтэй" гэдгийг онцолсон юм.

Харин сармагчны цэцэг өвчнөөр өвчилсөн өвчтөнүүдийг эмчилж байсан доктор Хью Адлер "Энэ бол бидний өмнө нь харж байсан хэв маяг биш байна. Энэ маш гэнэтийн зүйл" гэдэгт санал нэгтэй байгаагаа илэрхийллээ.

Эх сурвалж: BBC