“Нандин бүхнээ хамгаалъя” аяны хүрээнд Нийслэлийн цагдаагийн удирдах газрын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн ахлах мэргэжилтэн, цагдаагийн хошууч Г.Уранбаттай ярилцлаа.

Сүүлийн үед нийслэлийн хэмжээнд гэр бүлийн хүчирхийллийн нөхцөл байдал ямар байна?

Нийслэлийн хэмжээнд 2022 оны эхний 11 сарын байдлаар гэр бүлийн хүчирхийллийн улмаас 767 гэмт хэрэг бүртгэгдэж, өмнөх оны мөн үеэс 6.5 хувиар өсч, нийт гэмт хэргийн 3,3 хувийг эзэлж  байна. Гэр бүлийн хүчирхийллийн улмаас үйлдэгдсэн гэмт хэргийн 43.4 хувь нь согтуугаар, 10.1 хувь нь эмэгтэй хүн оролцож, 32.3 хувь нь 22-06 цагт, 86.9 хувь нь гэр, орон сууцанд, 31.3 хувь нь Даваа, Ням гаригт бүртгэгдсэн нь бусад гаригт бүртгэгдсэн гэмт хэргээс хамгийн их хувийг эзэлж байна.

“Нандин бүхнээ хамгаалъя” аяныг улсын хэмжээнд өрнүүлж байна. Аяны хүрээнд ямар ажлууд хийгдэж байна вэ?

Жендэрт суурилсан хүчирхийлэл, түүний хор уршгийн талаарх иргэдийн мэдлэгийг дээшлүүлж, хүчирхийллийг үл тэвчих нийгмийн хандлагыг төлөвшүүлэх, нуугдмал гэмт хэрэг, зөрчлийг илрүүлэх, хохирогчийн эрх, хууль ёсны ашиг, сонирхлыг хамгаалах, зөрчигдсөн эрхийг сэргээхэд төрийн болон төрийн бус байгууллага, иргэдийг оролцоог нэмэгдүүлэх, хамтын ажиллагаа сайжруулах  зорилгоор энэ оны 11 дүгээр сарын 25-ны өдрөөс 12 дугаар сарын 12-ны өдөр хүртэл “Нандин бүхнээ хамгаалъя” урьдчилан сэргийлэх, соён гэгээрүүлэх арга хэмжээг Монгол Улсад Гэмт хэргээс урьдчилан сэргийлэх ажлыг зохицуулах зөвлөл, Нэгдсэн Үндэстний  байгууллагын Хүн амын сан, НҮБХАС-ийн Жендэрт суурилсан хүчирхийлэлтэй тэмцэх төслийг хэрэгжүүлэгч төрийн болон төрийн бус  байгууллагатай хамтран зохион байгуулж байна. Энэ жилийн аяны хувьд гэр бүлийн хүчирхийллийг таслан зогсооход эрэгтэйчүүдийн оролцоо, манлайллыг дээшлүүлэх чиглэл рүү анхаарсан нь урьд урьдны аян арга хэмжээнүүдээс онцлог юм.  

Аяны хүрээнд гэр бүл бүхэн асуудлыг ярилцаж, ойлголцох замаар шийдвэрлэж, харилцан бие биедээ хүндэтгэлтэй хандах хандлагыг төлөвшүүлэх, хүчирхийллийг мэдсэн даруйдаа мэдээллэдэг байх ёс суртахууныг нийгэмшүүлэх агуулга бүхий нөлөөллийн компанит ажлууд хийгдэж байна.

Иргэдийн үйлчилгээ, мэдээлэл авч болох бүхий л сувгийг ашиглаж, гэр бүлийн хүчирхийлэл үйлдэх гэмт хэрэг, зөрчлөөс урьдчилан сэргийлэх, соён гэгээрүүлэх мэдээлэл хүргэхийг зорьж байна. Тухайлбал: Орон сууцны цахилгаан шатанд мэдээлэл байршуулах, гудамж талбайн лед дэлгэцүүд, үүрэн холбооны офираторууд, банк сургууль гээд бүхий л аж ахуй нэгжүүд нийгмийн хариуцлагын хүрээнд аянд идэвхитэй оролцож, өөр өөрсдийн боломжит сувгаар хүчирхийллээс урьдчилан сэргийлэх мэдээллийг иргэдэд дамжуулж байгаад талархал илэрхийлье.

Аяны үр дүнг та юу гэж харж байна вэ?

Энэ бүхний эцсийн зорилго нь гэмт хэрэг, зөрчилгүй, эрүүл, аюулгүй орчинд аж төрөх нөхцөлийг бүрдүүлэх, хүчирхийлэлгүй нийгмийг төлөвшүүлэхэд олон байгууллага, албан тушаалтан, иргэдийн хичээл зүтгэл оршиж байна, зохих үр дүнгээ ч өгч байна. Аливаа аян, соён гэгээрүүлэх ажил явагдаад өнгөрдөг хэдий ч аянаар хязгаарлагдахгүй цагдаагийн байгууллага өдөр бүр гэр бүлийн хүчирхийлэлтэй тэмцсээр байна, тэмцэх ч болно. Хэн нэгэн хаа нэг газарт үйлдэгдэж байгаа эсхүл үйлдэгдэж болзошгүй хүчирхийллийн нөхцөл байдлын талаар мэдээллэх үүргээ биелүүлэхэд л хангалттай. Мэдээлэл өгсөн иргэн таныг болон хохирогчийг хуулийн дагуу хамгаална. Иргэд хүчирхийллийг мэдээлдэг байгаасай, энэ миний оролцох хэрэг биш гэж, хаалгаа хаадаггүй байгаасай, учир нь мэдээллэхгүй байх нь тэр хүчирхийллийг далд, давтагдуулж, даамжруулах нөхцлийг та бүрдүүлж байна гэсэн үг. Харин мэдээллэвэл таслан зогсоогдох болно.

Хүчирхийллийн хохирогчид яг таны л тусламж хэрэгтэй байлаг. Магадгүй зарим тохиолдолд хохирогч хаана хандахаа ч мэдэхгүй байх, айдас, хүйдэст автсан ч байж болно. Түүнд заавал туслаарай. 

Баярлалаа. Танд амжилт хүсье.