Монгол эмэгтэй дэлхийн банк, санхүүгийн төв АНУ-ын Нью-Йорк хотын Уолл Стрийтд байрлах Нью-Йорк Меллон банканд ажиллахаар болсон тухай сайхан мэдээ байна. Тодруулбал, Н.Содонтуяа гэх бүсгүй дэлхийд тэргүүлэгч хөрөнгө оруулалтын Нью-Йорк Меллон банкны дэд захирлаар ажиллахаар болсон байна.

Тэрбээр эрсдэл болон комплаенс хэлтэст 2021 онд дадлагажигчаар ажиллаж байгаад ийнхүү хичээл зүтгэл, мэдлэг боловсролоороо ялгарч, “Vice President” буюу дэд ерөнхийлөгчөөр ажиллах санал хүлээж авчээ.

Н.Содонтуяа нь Санхүү эдийн засгийн их сургуульд санхүүгийн менежерээр бакалаврт суралцаж байгаад 2+2 хөтөлбөрийн дагуу Тайванийн Азийн их сургуульд үргэлжлүүлэн суралцаж, төгссөн байна. Мөн тэрбээр энэ онд АНУ-ын Калифорнийн их сургуульд бизнесийн удирдлагын магистрын зэргээ хамгаалжээ.

Сурч боловсрохын зэрэгцээ Н.Содонтуяа Монголд гарааны бизнес эрхэлдэг бөгөөд өсвөр насны охидод урам зориг өгөх намтар бүхий "Тусгал" номыг зохиосон, тал бүрийн мэдлэг авьяастай, нийгмийн идэвхтэй нэгэн юм. Тухайлбал, 14 насандаа "Спорт цонх"-д спортын сэтгүүлчээр ажиллаж, 16 насандаа "Супер Франк" номыг монгол хэл рүү хөрвүүлснээс гадна сүүлд хэд хэдэн ном, бүтээл орчуулж, туурвисан гэдгээр Монголчууд эчнээ танина.

Түүнийг бизнесийн сургуулийн шилдэг сайт болох “Poets and Quants”-аас 2022 оны бизнесийн удирдлагаар төгсөгч шилдэг 100 залуусын нэгээр нэрлэж, ярилцлага хийсэн байна. Энэхүү ярилцлагыг орчуулан хүргэж байна.

Төрөлх хот: Хэнтий аймаг /эзэн Чингис хааны төрсөн нутаг/

Өөрийнхөө тухай сонирхолтой баримт: Би Монголынхоо хөдөө нутагт хонь хариулж, үнээ сааж, морь унаж, нүүдэлчин ахуйд төрж, өссөн.

-Бизнесийн сургуульд элсэхээсээ өмнө хаана ажиллаж байсан бэ?

-Би Монголд Боловсрол, судалгааны чиглэлээр /Тасралтгүй Боловсрол Судалгааны Институт/ гарааны бизнесийн компанийн хамтран үүсгэн байгуулагч. Энэхүү байгууллагадаа удирдах албан тушаал хашдаг байсан. Манай байгууллага дэлхийн стандартад нийцсэн мэдлэг чадвартай, ёс зүйтэй мэргэжилтнүүдийг бэлдэхийн тулд төрийн байгууллага /Санхүүгийн зохицуулах хороо/-той хамтран ажилладаг.

-Та 2021 оны зун хаана дадлага хийсэн бэ?

-Би Уолл Стрит дэх Нью-Йорк Меллон (BNY Mellon) банкны төв байранд “Эрсдэл ба Нийцлийн хэлтэс”-т дадлага хийсэн.

-Бизнесийн сургуульд сурч байхдаа хичээлээс гадуур ямар ажил хийсэн бэ? 

-Профессор Эндрю Харгадоны MBA хөтөлбөрт хамрагдаж, Инновацийн менежментийн хичээлд суух явцдаа өсвөр насны охидод урам зориг өгөх зорилгоор өөрийн намтар, түүхээ монгол хэл дээр бичиж хэвлүүлсэн. Энэ номоороо дамуулж, өсвөр насны охидод хамгийн их тулгардаг жендерийн ялгаатай байдал, боловсролын хүртээмж, санхүүгийн бэрхшээл зэргээ зоригтойгоор даван туулж, өөрийгөө сорьж, хүсэл мөрөөдөл, тэмүүллийнхээ төлөө зүтгэх итгэл найдварыг өгөхийг хүссэн юм.

-Та мэргэжлийнхээ ямар амжилтаар хамгийн их бахархдаг вэ?

-Би Монголд үүсгэн байгуулсан гарааны бизнесээрээ дамжуулан 500 гаруй санхүүгийн салбарын мэргэжилтнүүдийг дэлхийд хүлээн зөвшөөрөгдсөн CFA-ийн шалгалтад бэлдэх чиглэлээр сургалтад хамруулсан. Ингэснээр манай хамт олон санхүүгийн салбарын мэргэжилтнүүдийн чадавхжуулж, мэргэжлийн ёс зүйн хэм хэмжээг нэмэгдүүлэн, Монголынхоо санхүүгийн зах зээлд тодорхой хэмжээнд хувь нэмэр оруулсан гэж боддог.

-Та яагаад Калифорнийн их сургуулийн Бизнесийн сургуулийг сонгосон бэ?

-Калифорнийн их сургуулийн Бизнесийн сургууль бол олон талт мэдлэг, сургалтын чанарын хүртээмжтэй байдлаараа олон улсад төдийгүй АНУ-д тэргүүлдэг. Тиймээс дэлхийн боловсролыг эзэмшихийг хүсч буй хүний хувьд, эмэгтэй хүний хувьд ч тэр энэ сургуульд л суралцахыг хүссэн. Мөн -40 хэм хүртэл хүйтэрдэг орноос ирсэн би Калифорнийн нарлаг байдлыг мэдрэхийг хүссэн.

Ярилцлага авагчтай чин сэтгэлээсээ хандсанаар би түүнтэй маш сайн ойлголцож чадсан.

-Өргөдөл гаргах явцад таны сонгосон сургуульд давуу байдал олгосон нэг зүйл юу вэ?

-Би ярилцлага өгөхдөө үнэхээр үнэн байсан. Би бүх зүйлийг үнэн сэтгэлээсээ хариулсан. Бизнесийн удирдлагаар сурч байхад багш маань мэргэжлийн харилцаа, холбоо байгуулахад чин сэтгэлээсээ, үнэн байх нь чухал гэдгийг хэлдэг байсан. Эргээд бодоход ярилцлага авагчтай чин сэтгэлээсээ хандсанаар би түүнтэй маш сайн ойлголцож чадсан бөгөөд энэ нь надад үнэхээр давуу тал болсон гэж боддог.

-Таныг коллежид бизнес эрхлэх шийдвэр гаргахад хэн хамгийн их нөлөөлсөн бэ?

-Миний аав. Аав маань намайг АНУ-д сурч, Уолл Стритэд ороорой гэж захидаг байсан. Монголын хөдөө амьдардаг, малчин айлын хувьд энэ нь маш том мөрөөдөл байсан. Аав маань намайг энэ бүхнийг хийх урам зоригийг өгч, АНУ-ын ардчиллын амин сүнсийг мэдрэхэд тусалсан.

Ярилцлагын төгсгөлд түүнийг яагаад онцолсон тухайгаа ийнхүү бичжээ.

Нэргүйдаваагийн Содонтуяа нь маш эерэг, өгөөмөр нэгэн бөгөөд бусдыг нэг зорилгын төлөө хамтран ажиллахад урамшуулж, тэрхүү байдлаараа бусдад үлгэр дурайлал болдог байлаа. Мөн тэрбээр даруу, эмзэг байдлаа бусдад харуулахаас айдаггүй, харин эрч хүчтэй, шийдэмгий байдлаараа ялгардаг төрөлхийн идэвхтэй удирдагч юм. Мөн нийгэм, олон нийт рүү чиглэсэн олон ажил санаачилж, түүнийгээ урагшлуулж, ажил хэрэг болгох тун мэдрэмжтэй.

Н.Содонтуяа мэддэггүй гэдгээсээ мөн алдаа гаргахаас айдаггүй гэдгээ нууж байгаагүй бөгөөд ур чадвараараа ч тэргүүлдэг байсан.

Содоогийн үлгэр жишээ болсон цөөн хэдэн жишээг ангийнхан нь мөн ярьжээ.

Би Содоотой санхүүгийн үндсэн ангийн нэгдүгээр дамжааны оюутан байхдаа танилцсан. Хэдийгээр тэрбээр MBA хөтөлбөрт элсэхээсээ өмнө CFA шалгалтанд тэнцсэн ч ангийн олон нөхдөөсөө санхүүгийн талаар илүү мэдлэгтэй байсан. Гэхдээ заримдаа тэр  байгууллагын нөхцөл байдал, практикт хэрхэн хэрэгждэг талаар мэдлэггүй байсан. Тэр мэдэхгүй зүйлийнхээ талаар маш  ил тод байсан ба надаас эсвэл ангийн бусад оюутнуудаас шинэ мэдлэг олж авахдаа ичдэггүй харин ч баяртайгаар асуудаг байсан. Санхүүгийн үндсэн ангид Содоо сайн дураараа судалгааны бүлгийг удирдаж, шалгалтын өмнө ангийнхандаа бэлдэж, өгдөг байсан. Дахин хэлэхэд, түүний хандлага нь өгөөмөр сэтгэл, нөхөрсөг байдал, сониуч зан холилдсон байв. Тэр бүх зүйлийг мэддэггүй гэдгээсээ мөн алдаа гаргахаас айдаггүй гэдгээ нууж байгаагүй бөгөөд ур чадвараараа ч тэргүүлдэг байсан юм.

"Би ирэх жилүүдэд түүний өсөлтийг харахыг тэсэн ядан хүлээж байна!" хэмээн ярилцлагаа өндөрлөжээ.

Орчуулсан Б.Гоо

Н.Содонтуяагийн орчуулсан номноос...