Эрдэнэс Монгол компанийн гүйцэтгэх захирал С.Наранцогтыг тойрсон балагтай үйл явдлууд сүүлийн үеийн улс төрийн дажинтай зэрэгцээд нийгэмд ил болсоор байна. Насаараа дарга дагаж төрийн алба хашсан С.Наранцогт нь өмнө нь Сангийн яам, Эдийн засаг хөгжлийн яаманд ажиллаж байсан бөгөөд бизнес эрхэлж байсан туршлагагүй түүнийг Эдийн засаг хөгжлийн сайд асан увсын Ч.Хүрэлбаатарын дэмжлэгтэйгээр монголын хамгийн том уул уурхайн групп компанийн буюу бизнесийн байгууллагын захиралаар томилогдсон гэдэг.

     Тэрээр Эрдэнэс Монгол компанийн захиралаар томилогдоод хийж хэрэгжүүлсэн нүдэнд торж гарт баригдахаар үр дүнтэй ажил гэж даанч алга байна гэдгийг салбарынхан нь төдийгүй олон нийт шүүмжилсээр байгаа бөгөөд харин түүний тарьсан балаг л сүүлийн үед ил болсоор байна.

 Баримт 1. Компанийн бүтцийг данхайлгаж, төсвийн зардлыг нэмэгдүүлэв.

  С.Наранцогт нь Гүйцэтгэх захирлаар томилогдоод Эрдэнэс Монгол компанийн бүтэц орон тоог 3 дахин нэмэгдүүлж төсвийн зардлыг нэмэгдүүлсэн байна. С.Наранцогт нь томилогдсоныхоо дараа тухайн үеийн ЗГХЭГ-ын дарга Д.Амарбаясгаланд бүтэц орон тоог нэмэгдүүлэх талаар танилцуулга хийж ингэхдээ шинээр ажилд авах хүмүүсийг нээлттэй сонгон шалгаруулалтаар ажилд авах ажлыг зохион байгуулахаар тохиролцсон байна. Сонгон шалгаруулалт нэртэй танил тал, өөрийн хүмүүсээр компанийг дүүргэх ажлыг ийнхүү хийж эхэлсэн бөгөөд өмнө нь 60 гаруй орон тоотойгоор ажиллаж болоод байсан компанийг  одоогоор 180 гаруй орон тоотой болгож данхайлгасан байна. Эдгээр 180 гаруй орон тоон дээр ажиллаж байгаа хүмүүс  нь бусад төрийн албан хаагчдын цалингаас 4-6 дахин их цалин хангамж авдаг нь шударга ёсонд нийцэхгүй байгаа бөгөөд гавьтай хийсэн ажилгүй хүмүүс зүгээр сууж байгаад өндөр цалин авч төрийн мөнгийг үр ашиггүй зарцуулсаар байна.

 

Баримт 2. Оюу толгой компаниас авсан 20 сая доллар алга болов.

Сүүлийн үед дуулиан тариад байгаа Оюу толгой компаниас Эрдэнэс Монгол компани болон түүний охин компаниар дамжуулж авсан гэх 20 сая долларын эрэлд УИХ-ын гишүүдээсээ эхлээд Монголчууд бүгд мордов. Лавтай мэдээллээр уг 20 сая долларыг Эрдэнэс Монгол компанийн охин компанийн данс руу Оюу толгой компаниас шилжүүлсэн нь үнэн бөгөөд харин зарцуулалтыг нь  нууцад хамааруулж байгаад үрээд дуусчихсан болж таарав. Энэхүү олон сая долларын зарцуулалтыг С.Наранцогт мэдээгүй юм шиг мэдэн будилж байгаа сурагтай. Угтаа бол энэ мөнгөний зарцуулах эрхийг, бас зарцуулалтад хяналт тавих үүргийг С.Наранцогт захирал өөрөө хэрэгжүүлж байсан нь тодорхой. Төрийн мөнгө уйлдаггүй ч ардаа мөртэй. Хууль хяналтын байгууллагууд энэ асуудлыг аль хэдийн шалгаад эхэлснийг Херо Баатарын хэлснээс харж болно.

  

  Баримт 3. Өөртөө 200 сая төгрөгийн урамшуулал авчээ.

С.Наранцогт захирал өөрийгөө сайн ажилласан гэж үнэлүүлээд 1 жилд 200 сая төгрөгийн урамшуулал цалин авсан байна. Угтаа  тэрээр үндсэн цалин гэж  сард 30 орчим сая төгрөгийн цалин авдагийг Төрийн өмчийн бодлого зохицуулалтын газрын даргын сэтгүүлчдэд өгсөн мэдээллээс тодорхой болсон. Цалингийн хэмжээг нь зарласанд ууралсан С.Наранцогт захирал Төрийн өмчийн бодлого зохицуулалтын газраас тогтоосон цалинг авч байгаа гээд эргэж мушгив. Тэгэхээр тэрээр жилд 360 орчим сая төгрөгийг зөвхөн үндсэн цалин гэж аваад дээрээс нь нэмэлт урамшуулал гэж 200 сая төгрөг авдаг нь ил болов. Харамсалтай нь авсан цалинтайгаа дүйцсэн ажил хийсэн үү гэвэл үгүй. Учир нь Эрдэнэс Монгол компани өөрөө үйлдвэрлэл эрхэлж хүрз нүүрс ч гаргадаггүй үндсэндээ цаасны компани юм байна. Энэ бол төсвийн үрэлгэн зарлагын бас нэгэн сонгодог жишээ юм.

 

 Баримт 4. Охин компаниудаасаа менежментийн төлбөр нэрээр дээрэм хийв.

Эрдэнэс Монгол компани өөрөө үйлдвэрлэл эрхэлдэггүй ч үйлдвэрлэл эрхэлж байгаа охин компаниудаасаа менежментийн төлбөр нэртэй боловсон дээрэм хийсэн байна. Тухайлбал өнгөрсөн жил л гэхэд охин компаниудаасаа 200 гаруй тэрбум төгрөгийг ямар ч менежмент үйлчилгээ үзүүлээгүй байж шууд борлуулалтын орлогоос нь татаж авч зарцуулсан байна. Энэ нь Үндэсний аудитын газрын аудитын хяналт шалгалтын дүгнэлт тайланд тоо хэмжээгээрээ дурайж байх юм. Угтаа энэ мөнгө ард түмний баялгийн санд орох ёстой ч Наранцогт захирлын гараар ордог байна.

                Үргэлжлэл бий...