Өрнөдийн орнууд Украинд алсын тусгалтай эвсэг нийлүүлж байгааг ОХУ-ын Ерөнхийлөгч Владимир Путин шүүмжилж , Москва барууны бай руу довтлохын тулд ижил төрлийн зэвсгийг бусад оронд нийлүүлж болзошгүйг анхаарууллаа.

ОХУ-ын Ерөнхийлөгч "Хэрэв хэн нэгэн дайны бүсэд зэвсэг нийлүүлж, үүгээрээ манай нутаг дэвсгэрт халдан бидэнд асуудал үүсгэх боломжтой гэж үзэж байгаа бол бид яагаад хариу довтлох зэвсэг нийлүүлэх эрхгүй гэж" хэмээн Санкт-Петербург хотноо хийсэн хэвлэлийн бага хурал дээр хэлжээ. Гэхдээ Оросын зүгээс ямар улс орнуудад зэвсэг нийлүүлж болохыг тодорхой хэлээгүй байна.

Герман улс Украинд зэвсэг нийлүүлэн Оросын нутаг дэвсгэрт цохилт өгөх боломжтой хэмээн мэдэгдсэнийг Путин онцлон буруутгалаа.  

Их Британийн Гадаад хэргийн сайд Дэвид Кэмерон зэвсгийг хэрхэн ашиглахаа Украин өөрөө шийднэ хэмээгээд Оросын нутаг дэвсгэрт байгаа объектод цохилт өгөх эрхтэй гэж мэдэгдэв.

Харин АНУ-ын зүгээс Украинд нийлүүлсэн зэвсгийг ОХУ-ын нутаг дэвсгэрт байгаа объектуудад цохилт өгөх зөвшөөрлийг өгсөн боловч зөвхөн Харьковын ойролцоох бүс нутагт ашиглаж байгаа. Харин Украин Оросын нутаг дэвсгэр рүү довтлохдоо алсын тусгалт АТАКМС пуужинг ашиглах боломжгүй гэж Цагаан ордон мэдэгдсэн юм.

Оросууд Украины хойд хилийг давснаас хойш Харьковын зүүн хойд хэсэгт ширүүн тулаан өрнөж байна. Украины хоёр дахь хот болох Харьков нь хилээс ердөө 30 км зайд оршдог юм.