"Let's check" сурвалжилга дэлгүүрийн лангуун дээр худалдаалж буй хиам, сосискны орц найрлагын талаарх нийгмийн сүлжээнд цацагдаад буй мэдээллийг нягталлаа.

Бид Тусгаар тогтнолын ордны B1 давхарт байрлах "Оргил" худалдааны төвөөр орж, ямар бүтээгдэхүүн худалдаалж байгааг сонирхов. Гэвч дөнгөж ороод, эхний барьж авсан хиамны хугацаа нь дууссан дүр зураг угтсан юм. Тухайлбал, 2022 оны тавдугаар сарын 19-ний өдөр үйлдвэрлэсэн "Зочин" хиам өчигдөр буюу зургадугаар сарын 01-ний өдөр дуусахаар савлагдсан байв. Гэвч 24 цаг өнгөрчихөөд байхад дэлгүүрийн лангуун дээр зарагдсан хэвээр.

Үүний дараа бид "Хиамыг боловсруулахын тулд 12-24 цаг нитритийн уусмалд хонуулж, савладаг" гэх мэдээллийг нягталсан юм.

Тус дэлгүүрт байсан бүх л хиам, сосисконд үндсэн орц болох махнаас гадна нитрийн уусмал, /E250, Е230/ нитрийн давс зэрэг орсон байв. Энэ талаар бид мэргэжилтнээс тодруулахад "Нитрит бол хиамыг улаан, ягаан өнгөтэй болгож, өөрчилдөг гол бодис. Бүх л хиам, сосиск үүнийг ашигладаг. Гол нь зохистой хэмжээ гэж бий. Стандарт хэмжээнээс хэтэрвэл хор болно" гэлээ.

Мөн Хоол зүйч М.Тунгалаг "Дэлхийн бүх л улс оронд энэ төрлийн бүтээгдэхүүн бий. Гол нь зохист хэмжээнээс нь хэтрүүлэхгүй боловсруулах, бүр огт нитрит ашиглахгүй байх сонголт үйлдвэрлэгчдэд байдаг. Үүнээс гадна худалдан авч хэрэглэж буй хүмүүст хиам, сосискийг эрүүл мэндэд сөрөг нөлөөтэй гэдгийг мэдсээр байж хэрэглэх, хэрэглэхгүй байх сонголт мөн бий. Гол нь улиралд нэг, сард нэг гэдэг ч юм уу тааруулж хэрэглэх нь зөв юм" гэлээ. Түүнтэй ярилцсан дэлгэрэнгүй мэдээллийг бид маргааш хүргэнэ.