Ерөнхийлөгч асан Х.Баттулга нарын долоон найзууд тус бүр 10 сая төгрөг нийлүүлэн 1993 онд "Монгол бизнес" банкийг байгуулсан нь тухайн үедээ хамгийн эрэлттэй, олон зээлдэгчтэй банк байв.
Өнөөгийн "том" гэх бизнесүүд тус банкнаас зээл авчихаад төлөлтөө хийлгүй явсаар дампууруулсан түүхийг эргэн сэргээж, хөндөе.
Ерөнхийлөгч асан Х.Баттулга, Шунхлай групп гээд бичвэл уртаас урт жагсаалт бий тул эхний удаад Монгол Улсын нэрийн өмнөөс бусдын буруу, зөвийг хэлэлцэн шийддэг тангараг өргөсөн шүүгчээс, шүүх байгууллагаас шударга ёсыг нэхье.
Сонгинохайрхан дүүргийн Иргэний хэргийн анхан шатны шүүхийн шүүгч А.Энхтөр нь "Монгол бизнес" банкнаас 1994.01.18-ны өдөр 20 мянган ам.долларыг сарын 17 хувийн хүүтэй, 60 хоногийн хугацаатай зээлийн гэрээ байгуулж авсан байна.
Ингэхдээ тухайн үеийн Ардын банкны орлогч дарга М.Сүхээгээр батлан даалт гаргуулаад "бизнес хийнэ ээ" гээд авчихсан. А.Энхтөр мэтчилэн зээлдэгчид зээлээ төлөхгүй байсаар банк дампуурах эрсдэл орж 1998 онд дамдуурлаа зарлаж, татан буугдсан байна.
Мэдээж банк дампуурлаа зарлахгүйн тулд зээлдэгч нараа эрэн хайж, шүүхэд нэхэмжлэл гаргаж хэрэндээ тэмцсэн ч тусыг эс олжээ. Зээл аваад сураггүй алга болсон хүмүүсийг эрэн хайх ажиллагаанаас А.Энхтөр сугарч үлдээгүй ч, олон жил зугтаж чадсан байдаг. Түүнийг шүүхэд нэхэмжлэгчээр дуудах бүрт хаяг тодорхойгүй гэх шалтгаанаар нэхэмжлэл нь буцаагдаж, цаг хугацаа ч явсаар хуулийн дагуу хөөн хэлэлцэх хугацаа дууссаны дараа 2006.06.07-ны өдрийн 469 тоот Чингэлтэй дүүргийн шүүхийн шийдвэрээр эрэн сурвалжилсаны эцэст А.Энхтөр олдсон.
Эрэн сурвалжилснаас хойш дөрвөн жилийн дараа А.Энхтөрийг шүүхийн танхимд дуудан, хэргийг нь шүүж, шүүх шийдвэрээ гаргав. Тэртээх 29 жилийн өмнө зээлсэн 20 мянган ам.долларыг төлөхгүй ээ гээд тас "гүрийчихсэн" байгаа Сонгинохайрхан дүүргийн Иргэний хэргийн анхан шатны шүүхийн шүүгч А.Энхтөрийг "зээлээ төлөө" гэдэг шүүхийн шийдвэр гараад 13 жилийн хугацаа өнгөрчээ.
Тодруулбал, 1994 онд "Монгол бизнес" банкнаас авсан 20 мянган ам.долларыг 2010.04.22-ны өдрийн Баянгол дүүргийн Иргэний хэргийн анхан шатны шүүхийн 793 тоот шийдвэрээр А.Энхтөрийг тухайн үеийн ам.долларын ханшаар буюу 36 сая 850 мянган төгрөгийг Монгол банкинд төлөх шийдвэр гарсан байна.
Анхан шатны шүүх шийдвэрээ гаргасны дараа А.Энхтөр "тухайн үедээ нэхээд авахгүй яасан юм" гэсэн агуулгаар мэлзэж, зээлээ төлөхгүй ээ гэж гүрийсээр түүний хэрэг давж заалдах шатны шүүхээс эргэж буцсаар өнөөдөр Улсын Дээд шүүхэд хүргэгдээд буй.
Түүнтэй холбоотой 20 мянган ам.долларын зээлийг төлүүлэх эсэх, зээл төлөгдсөнөөр ард нь хохирч үлдсэн иргэн, аж ахуйн нэгжийн хохирол барагдах эсэх нь тун удахгүй шийдэгдэнэ.
Энд дахин нэг хэргийг сануулбал, 2019.02.23-ны шөнө Шүүхийн шийдвэр гүйцэтгэх байгууллагын харьяа цагдан хорих 461 дүгээр ангид саатуулагдаж байхдаа амиа хорлож нас барсан Салхитын мөнгөний ордны авлигалын хэрэгт сэжиглэгдэж байсан шүүгч асан Л.Бямбаа, мөн тус хэрэгт нэр холбогдсон 17 шүүгчдийн хэд хэд нь А.Энхтөрийн хэргийг олон жил "зууралдуулж" өдийг хүргэжээ.
ҮРГЭЛЖЛЭЛ БИЙ...