Ховд аймгийн Замын цагдаагийн тасгийн даргаар ажиллаж байсан Н.Балжинням нь  авлига албан тушаалын, гэр бүлийн хүчирхийллийн хэрэгт холбогдож, шүүхэд яллагдагчаар татагдаад буй мэдээлэл хэдхэн сарын өмнө олны анхааралд өртөж байв. Анхааралд өртөх болсон шалтгаан нь шүүхэд яллагдагчаар татагдсан албан хаагч нь нутаг сэлгэн Өмнөговь аймагт ШША-ны даргаар томилогдож, тэр бүү хэл төрийн дээд одон медиалаар удаа дараа шагнуулсан явдал байсан юм.

Энэ асуудал олон нийтэд ил болохтой зэрэгцэн ШШҮХ-ийн захирал асан, цагдаагийн хурандаа Б.Болдбаатар руу " Өглөөний мэнд ах. Дансаараа явуулаарай" гэсэн зурвасны хариуд Б.Болдбаатар нь өөрийн нэр дээрх 572080.... тоот Хаан банкны дансаа явуулсан нь ил болсоны дараахан чимээгүйхэн ажлаа өгчихөөд, тэтгэвэрт гарах өдрөө хүлээн суугаа. 

УИХ-ын гишүүдийг ч, ШШҮХ-ийн захирлаа ч хэдэн төгрөгөөр атгаад сурчихсан Н.Балжинням харин өдгөө хүртэл нам гүм, аль болох загасны ой санамжтай ард түмнийхээ сенсааци дундуур мартагдаад албан тушаалтайгаа үлдчих санаатай байгаа бололтой. Ямартай ч Б.Болдбаатар захирал хариуцлага тооцож чадалгүй өөрөө унаж, дараагийн захирлаар цагдаагийн хурандаа Ж.Буянбат томилогдоод сар гаруйн хугацаа өнгөрч байгаа ч энэ хэргийн талаар нүд нь балай, чих нь дүлий мэт байна. 

Угтаа төрийн албан хаагч авлига албан тушаалын гэмт хэрэг, гэр бүлийн хүчирхийллийн хэрэгт холбогдон шалгагдаж байхдаа дахин авлига албан тушаалын хэрэг үйлдэж буй нь зурвасаар нотлогдчихоод байхад хариуцлагаа тооцож чадахгүй өдийг хүрч байгаа нь ХЗДХЯ, УИХ-ын гишүүд, ШШҮХ-ийнхэн авлига, хүнд суртал, шударга бус байдалд хэдийнээ дасан зохицчихсон байгааг харуулж байна. 

ШШҮХ-ийн захирлаар томилогдоод буй цагдаагийн хурандаа Ж.Буянбат нь томилогдсон цагаасаа хойш сандал, суудлын хэрүүл тэмцэл хийж, халгаа сэлгээг баруун солгойгүй хийж байгаа ч яллагдагчаа яаж ч чадахгүй суугаа нь дараагийн нэг өдөр аль нэг банкны дансны дугаараа Н.Балжинням руу зурвасаар явуулчихсан нь ил болох вий гэсэн хардлагыг төрүүлэхүйц байна. 

ҮРГЭЛЖЛЭЛ БИЙ...