НӨАТ-ын сугалааг 2022 оны дөрөвдүгээр сараас зогсоогоод байсан бол ирэх есдүгээр сараас сэргээхээр төлөвлөж байгаа талаар албаны эх сурвалж мэдээллээ.
Тодруулбал, Сангийн яамны Татварын бодлогын газрын дарга Б.Тэлмүүн "НӨАТ-ын сугалаа анх гарсан цагаас хойш маш их гомдол санал ирж байсан. Тухай бүрт нь татвар болон цагдаагийн байгууллагаас шалгахад ямар нэгэн зөрчил илрээгүй. И-баримтын системийн аюулгүй байдлыг өнгөрсөн оны сүүлээс олон улсын мэдээллийн системийн аюулгүй байдлын стандартад шилжүүлсэн. Байнгын шалгалтад орж байсан систем учраас асуудал үүсч байгаагүй.
Төлбөрийн баримт идэвхтэй бүртгүүлдэг иргэдээ дэмжих бодлого барьж байгаа. Өөрөөр хэлбэл, олон төлбөрийн баримт бүртгүүлэх тусам өндөр шагналтай сугалаанд оролцох эрх нээгдэх хувилбарууд яригдаж байна. Тухайлбал, 10 хүртэлх баримт бүртгүүлсэн хүнд сугалааны 3 орон таарвал 30,000, 5 орон таарвал 60,000 төгрөг хожих боломж нээгдэх бол 51-ээс дээш баримт бүртгүүлсэн хүний 3 орон таарвал 60,000, 5 орон таарвал 500,000 төгрөгийн азтан болох боломж бүрдэх ч юм уу. Эцсийн байдлаар батлагдаагүй ч ийм хувилбараар иргэдийг идэвхжүүлэх боломжтой гэж үзэж байгаа.
Мөн өмнө нь супер азтан тодрохгүй улирал гардаг байсан бол одоо тухайн улиралд хэвлэгдсэн баримтуудын дугаарын хүрээнд бүх хонжвор дээр заавал азтан тодордог болох юм. Ингэснээр жилд 550,000 орчим азтан тодрох нөхцөл бүрдэнэ гэж тооцоолж байгаа" гэлээ.
Сугалааны тохирлыг зогсоосон ч НӨАТ-ын дүнгийн хоёр хувийн буцаан олголт хэвээр үргэлжилж байгаа юм.