Хичээлийн шинэ жил эхлэхэд сар хагасын хугацаа үлджээ. Эцэг эхчүүд хичээлийн дүрэмт хувцаснаас эхлээд хүүхдийнхээ хичээлийн бэлтгэлийг хангах ажил ид өрнөж буй. Гэвч дүрэмт хувцасны үнэ өмнөх жилүүдийнхээс эрс нэмэгдсэн тухай нийгмийн сүлжээгээр гомдол, шүүмж өрнөх болов. Зарим нь сурагчийн дүрэмт хувцаснаас татгалзаж, энгийн поло цамц, хар өмд өмсүүлэх тухай ч санал дэвшүүлээд байна.

Амьдралын боломж өртөг тааруу өрхүүдэд үнийн өсөлт дарамт болж байгаа хэдий ч нөгөө талаас дүрэмт хувцсаар жигдрэх нь хүүхэд бүр ижил тэгш байж, ялгаварлан гадуурхалтаас ангид байх нөхцөлийг бүрдүүлдэг гэдгийг зарим судлаачид онцолж байна. Ийн шүүмж, мэтгэлцээн өрнөх болсон нь мөн дүрэмт хувцасны чанар, хийцтэй ч холбоотой юм.

Үндэсний үйлдвэрүүдэд БСШУЯ-наас загвар болон стандартыг тодорхойлж өгдөг ч чанар стандарт, борлуулалтад хяналт тавьж оролцдоггүй ажээ.

Энэ талаар бид зарим иргэдээс үзэл бодлыг нь сонссон юм.

Иргэн А.Болормаа "Манай ач охин бага ангид сурдаг. Өмнө жил арай илүү эдэлгээтэй байх гэсэн үүднээс дотоодын дүрэмт хувцас авч өгтөл бөөсөрчихсөн. Эцэг эхчүүд сургуулийн дүрэмт хувцас худалдан авахдаа дотоодын үйлдвэрийн бараа бүтээгдэхүүнийг илүүтэй сонирхдог ч хэт өндөр үнэтэй.  Тэгсэн атал нэг жилийн эдэлгээ даахгүй материалтай байдаг. Ийм дүрэмт хувцсыг үнэтэй авна гэдэг хэцүү. Дотоодын дүрэмт хувцас үнийн хувьд илүү өссөн байна. Хятадаас орж ирдэг дүрэмт хувцаснаас ялгараад байх зүйлгүй санагдсан. Ихэнх хүмүүс л үнэ хямд, материал нь хог татахгүй, биед эвтээхнийг нь сайшааж Хятадаас орж ирсэн дүрэмтийг авч байна” гэж ярилаа.

Шүүмжлэл дагуулаад буй үнийн асуудлын тухайд борлуулагчид түүхий эдийн үнийн өсөлт болон тээврийн зардлын улмаас дүрэмт хувцасны үнэ өссөн гэсэн байр суурьтай байгаа билээ.

Иймд бид дотооддоо үйлдвэрлэдэг болон урд хөршөөс орж ирдэг сурагчийн дүрэмт хувцасны үнэ ханшийг тодруулахаар сурагчийн дүрэмт хувцас худалдаалдаг Бөмбөгөр, Дүнжингарав худалдааны төв болон “Өүлэн Менч”, “Бүтээлч Үйлс” ХХК-нийг зорилоо.

Биднийг “Бөмбөгөр” худалдааны төвд очиход хөл хөдөлгөөн ихтэй, хүүхдийнхээ хичээлийн бэлтгэлийг хангаж яваа эцэг эхчүүд тааралдлаа. “Хүүхдийн дүрэмт хувцасны үнэ тэнгэрт хадчихсан байна” гэх үг лангууны цаана байх ихэнх хүнээс гарах аж.

Монголд үйлдвэрлэсэн дүрэмт хувцасны үнийн хувьд өмнө жил:

• Бага ангийн сурагчдын дүрэмт хувцас 88-117 мянган төгрөг
• Дунд анги 136-144 мянган төгрөг
• Ахлах анги 158-172 мянган төгрөгийн хооронд байсан бол энэ жилийн байдлаар бага анги 115-165 мянган төгрөг, дунд анги 193-198 мянган төгрөг, ахлах анги 213-232 мянган төгрөгийн хооронд худалдаалагдаж байна. Материалын хувьд 60 хувь нь хөвөн даавуу, 40 хувь нь хонины ноосоор үйлдвэрлэсэн мөн биед эвтэйхэн, бөөсрөхгүй, харшил өгөхгүй зэргийг үйлдвэрлэгчид онцолж байлаа.

Харин урд хөршөөс орж ирдэг дүрэмт хувцасны хувьд бага анги 103-165 мянган төгрөг, дунд анги 192-196 мянга төгрөг, ахлах анги 210-230 мянган төгрөгний үнэтэй байв.

Өмнө жилээс 10-32 мяган төгрөгөөр нэмэгдсэн бөгөөд харин зургаан сард урдаас авчирсан гэх зарим лангуу нь өмнө жилийнхээ үнээр худалдаалж байлаа.

"Дүнжингарав" худалдааны төвийн хувьд бага ангийн сурагчдын дүрэмт хувцас 88-117 мянган төгрөг, дунд анги 136-144 мянган төгрөг, ахлах анги 158-172 мянган төгрөгийн хооронд байсан бол өнөөдрийн байдлаар бага анги 115-165 мянган төгрөг, дунд анги 193-198 мянган төгрөг, ахлах анги 213-232 мянган төгрөгөөр худалдаалж байна. Урд хөршөөс оруулж ирдэг дүрэмт хувцас нь даавуун материалтай, биед эвтэйхнээс гадна үнийн хувьд дотооддоо үйлдвэрлэсэн дүрэмт хувцаснаас хямд учир худалдан авагч элбэг байв.

“Өүлэн менч” ХХК-ийн хувьд бага ангийн дүрэмт хувцас 115-164 мянган төгрөг, дунд анги 192-197 мянган төгрөг, ахлах анги 212-231 мянган төгрөгний үнэтэй байна.

“Бүтээлч Үйлст” ХХК-ийн хувьд бага анги 115-165 мянган төгрөг, дунд анги 192-197 мянган төгрөг, ахлах анги 212-232 мянган төгрөгөөр худалдаалж байв.

Дунд ангийн сурагчдын дүрэмт хувцасны үнэ 20-40 мянган төгрөгөөр, ахлах анги 50-60 орчим мянган төгрөгөөр нэмэгджээ. Энэ хичээлийн жилд сурагчийн дүрэмт хувцас өнгөрсөн онтой харьцуулахад багц үнээрээ 10-60 мянган төгрөгөөр нэмэгдэж, 29 хувиар өссөн үзүүлэлттэй байна.