Бүх нийтээрээ тэмдэглэн өнгөрүүлдэг баяр наадмын өмнө төрийн шагналыг баруун солгойгүй олгодог болоод удаж буй. Ямартаа л Сүхбаатарын талбайн хажуугаар өнгөрөхдөө шагнуулчихлаа гэдэг явган шог яриа гархав. Гэхдээ шагнал эзнээ олж очих, андуурч шагнагдах хоёрт тэнгэр газар, өдөр шөнө шиг ялгаа бий.

Энэ жилийн улсын баяр наадмын өмнө Ерөнхийлөгчийн зарлигаар нэр бүхий хүмүүст генерал цол олгосон байна. Ингэхдээ олны хэл амнаас болгоомжилж “хулгайгаар” цолыг нь олгосон байдаг.

Тодруулбал, Ерөнхийлөгчийн 2022.07.08-ны өдрийн ЗАРЛИГААР:

• Батлан хамгаалахын сайд Г.Сайханбаярт ДЭСЛЭГЧ ГЕНЕРАЛ цол,
• ШШГЕГ-ын дарга, хурандаа Д.Загджав
• Дотоодын цэргийн штабын дарга, хурандаа Р.Чингис
• ХХЕГ-ын Захиргааны удирдлага эрхэлсэн дэд дарга, хурандаа Д.Мөнгөнжин
• ЦЕГ-ын тэргүүн дэд дарга, хурандаа Ц.Ням-Очир
• Нийслэлийн Цагдаагийн удирдах газрын дарга, хурандаа Р.Отгонжаргал нарт БРИГАДЫН ГЕНЕРАЛ цол олгожээ.

Энэ тухай Ерөнхийлөгчийн тамгын газрын сайт болон бусад мэдээллийн хэрэгслээр мэдээлээгүй бөгөөд ихэд нууцлахыг дор бүрнээ үүрэгдсэн нь төр генерал цолтнуудаасаа ичив үү гэх хардлагыг өөрийн эрхгүй төрүүлж байна.

Цэргийн дээд цолыг олгох нь цэвэр Ерөнхийлөгчийн үзэмж, үнэлгээгээр шийддэг учир хэндээ цол олгох нь Ерөнхийлөгч У.Хүрэлсүхийн мэдлийн хэрэг. Тиймээс гавьяа, шагналаараа цэргийн дээд офицерын цол буюу бригадын генерал цол авч байгаа хэдийнхээ хажуугаар тохиролцооны гэхэд үнэнээс хол зөрөхгүй хэдийгээ хавчуулан Батлан хамгаалахын сайд Г.Сайханбаярт хошууч генерал цолыг алгасаж дэслэгч генерал, ШШГЕГ-ын дарга, хурандаа Д.Загджав, Дотоодын цэргийн штабын дарга, хурандаа Р.Чингис нарт бригадын генерал цол олгожээ.