“Би Монгол хүний саруул ухаанд итгэдэг.”- С.Зориг

Сайн байцгаана уу? Сайхан өвөлжиж байна уу? Намайг Уянгын Равдан гэдэг. Яруу найрагч Цоодолын Хулангийн том хүү. Сайхан амьдралд тэмүүлж гадаадад амьдарч буй олон мянган залуусын л нэг.

Эхнэр 4 хүүхдийн хамт Австрали улсад амьдардаг. Бусдын л адил энд Барилгын арматур зангиддаг төмрийн ажил хийдэг.

Миний гэр бүл болон ээжид минь сүүлийн хэд хоногт тохиолдож буй аймшигт явдлын талаар өөрийн үгээ хэлэх гэсэн юмаа.

4 хоногийн өмнө ээжийг маань насанд хүрээгүй охин дүүгийн минь хамт өглөө эрт гэрт нь болон зусланд нь 20 гаруй ТЕГ-н ажилтнууд 5-6 машинтай ирж нэгжлэг хийн, дүүгийн минь гар утсыг хүртэл хураан авч, ээжийг маань шөнө дөл болтол байцааж дараа нь хорих 461-т 48 цагийн хугацаатай саатуулсан тухай итгэмээргүй мэдээ сонссон.

Хууль хяналтын байгууллага асууж тодруулах зүйлсээ асуугаад явуулах юм болов уу? гээд итгэж хүлээж байтал өмгөөлөгчгүйгээр хуралдан дахин 1 сараар сунган итгэл хөсөрдлөө.

Та нар юунаас айж, ингэж яаран сандран хөдлөнө вэ?!

Бидэнд энэ бүхний цаана хэн байна вэ? ямар эрх ашиг нөлөөлөв? гэсэн сэжиг таамгууд олон байна.

Үүний нэг нь Зариг.мн сайт яагаад ар гэр болон бусад хэн ч мэдээгүй, юу болохыг айж түгшээд ажиж байхад Нууцын гэх зэрэглэлтэй хэргийн үйл явцыг хэнээс ямар зорилгоор хэрхэн олж авч, олонд буруу сэтгэгдэл төрүүлэхүйц мэдээг удаа дараа тавив?

Ямар хэрэг зохиогоод хорьчихвоо? Үүнийг та бүхэн тунгаан бодоорой!

Ээж минь эртнээс олон түмэндээ өөрийн үзэл бодлоо хэнээс ч айж ичилгүйгээр өөрийн шүлэг, нийтлэл, ном бүтээлүүдээрээ илэрхийлсээр ирсэн.

Ямарч шүүмжлэл доромжлолыг үл тоон үзэл бодлоо илэрхийлэн өдийг хүрсэн! Алдаа оноо нь илхэн, шулуун шудрага ээжийг минь ийм айхтар хэрэгт хийхээр шийдсэн бол та бүхэн эргээд нэг сайн бодоорой!

Найз нөхөд, үзэл бодол нэгтэй хүмүүс нь битгий айгаарай! Зоригтой үгээ хэлээрэй!

Ер нь хэнийг ч бай шүүхийн шийдвэр нь албан ёсоор эцэслэж гараагүй байхад бүү ялла!!

Хуулиа мөрддөггүй юм бол хүн чанараа ёс зүйгээ бүү гээгээрэй гэж илт харлуулан бахирч зохион байгуулж буй хүмүүст нь хэлмээр байна.

Та нарт ч ийм зүйл тохиолдохгүй гэх баталгаа байхгүй.

Хүнийг унасан дээр нь дэвсэх шиг амархан бөгөөд адгийн зан байхгүй!

Дэмжээд босгохгүй юм аа гэхэд бүү дэвс, бүү баярла!

Жинхэнэ эх орноосоо урвагч нар хаана бна вэ?

Манай гэр бүлд тохиолдож буй энэ үл итгэмээр явдал хэрхэн өрнөхийг бид нарийн ажиглах болно. Миний ээж эх орноосоо урвах хүн биш үүнийг би эргэлзээгүй мэдэж байна. Үүнийг бид ээжид дайсагнасан хүмүүсийн явуулга гэж хардаж байна.

Та бүхнээс хүсэхэд дахиад нэг тунгаан бодоорой!

МУСГЗ, сэтгүүлч, яруу найрагч Цоодолын Хулан:

ЦЭЦГИЙН ТОЛГОЙ ТАСДДАГГҮЙ

ҮРТЭЙ БАЙХЫГ ХҮСНЭ БИ

ЦЭЦДИЙН ТОЛГОЙ АВДАГГҮЙ

ТӨРТЭЙ БАЙХЫГ ХҮСНЭЭ….

Ц.Хулангийн том хүү У.Равдан