Хүүхдийн мөнгөн тэтгэмжийг Монгол Улсын нийт өрхийн 91 хувьд нь олгох шийдвэр гарсан гэгдэж буй. Энэ хуулийн хүрээнд 78 мянган өрхийн 113 мянган хүүхдийг 2023 оны хүүхдийн мөнгөн тэтгэмжээс хасаж, шинээр бүртгэл хийж буй. 

Гэвч ehalamj.mn, e-mongolia.mn хаягт нэвтрэн өөрсдийн мэдээллээ шалгасан иргэдийн мэдээлэл илт зөрүүтэй болж, өчигдрөөс хойш олон нийтийн бухимдлыг төрүүлээд байна. 

Энэ асуудлаар өнөөдөр ХНХЯ, ҮСХ хамтран мэдээлэл хийхдээ цахим бүртгэлд гаргасан алдаа бол иргэдийн алдаа. тиймээс өөрсдөө холбогдох байгууллага дээр нь очиж алдаагаа засуулаарай гэдэг тайлбарыг өгч байв. 

ҮСХ-ны Дэд дарга Д.Лхамсүрэн "Хүүхдийн мөнгийг зорилтод бүлэгт олгоход төрийн 10 гаруй байгууллага Дэлхийн банк хамтран оролцсон. Орлогыг оруулан тооцох аргыг ашигласан. Олон улсад зорилтод бүлгийг тодорхойлоход ашигладаг аргачлал. Энэхүү аргачлалын дагуу үнэлгээг хийсэн. Хүүхдийн мөнгийг 91 хувьд өгөхөөр болсон. Аргачлал маань зөв ажиллаж байгаа. Аргачлалыг боловсруулж тооцоолох цаг хугацаа уягдаад, үл хөдлөхөө борлуулчихаад дараагийн хүнд очих хүртэл мэдээллийн чанарын асуудал гарахыг үгүйсгэхгүй. Хэрвээ чанарын асуудал байх юм бол үнэн зөв мэдээллийг баг хороотойгоо хамтарч хийж болно" гэлээ. 

Харин яамны зүгээс төр, иргэн хамтарч цахим шилжилтийн хүрээнд засварлах мэдээллийг засварлах шаардлага гарсан. Ийм учраас иргэд та бүхэн ehalamj.mn болон e-mongoli.mn хандаж мэдээллээ засаж залруулах боломжтой. Өрхийн мэдээллээ өөрчлүүлж болно. Алдаагаа засаж шинэчлүүлж хүсэлт гаргасан өдрөөс хүүхдийн мөнгийг нөхөж олгоно. Төр хувь хүний мэдээллийг шууд засах боломжгүй гэх тайлбарыг өгсөн юм. 

Өчигдрөөс эхэлж гарсан будлианы үр дүнд иргэд хороо, АТҮТ, УБЕГ гэх мэт мартшрутаар цаг зав, шатахуун, мөнгө зарлагадан төрийн байгууллагын алдааг засаж залруулах "ажилтай" болж байна. Харин будлианы "толгойлогч" Т.Аюурсайхан сайд иргэд мэдээллээ засаж дуустал хүүхдийн мөнгийг нь олгохгүй ээ гэж барьцаалаад төсвийнхөө мөнгийг хэмнэх бодлогоо хэрэгжүүлэх нь ээ.