Өвөрхангай аймгийн Хархорин суманд байрлах ШШГЕГ-ын харьяа Хорих 423 дугаар ангид ял эдэлж байсан С, М нар өчигдөр шөнө 22.00 цагийн орчимд алга болжээ. Эх сурвалжийн мэдээллээр, тухайн үед тус хорих ангийн нэр бүхий албан тушаалтнууд архи согтууруулах ундаа хэрэглэсэн байсан аж. Энэ үеэр дээрх хоригдлууд ногоон талбайн ажлаас ийн оргон зугтжээ. Хоригдлуудыг эрэн хайх ажиллагаа үргэлжилж байна. Бид ШШГЕГ-ын холбогдох албан тушаалтнаас эл асуудлаар тодруулахад “Бид энэ талаар мэдээлэлгүй байна. Эргээд холбогдоё” гэдэг хариултыг өглөө.

Оргосон хоригдол М-ийн тухайд 1999 онд төрсөн, Баянхонгор аймагт амьдарч байсан, ял эдлэхээсээ өмнө эрхэлсэн тодорхой ажилгүй, шүүхээс 3 жилийн ял шийтгэл оноосон байжээ. М нь  цэнхэр өнгийн футволк, улбар шар өмд, хар өнгийн түрүүтэй гуталтай оргожээ.

Харин хоригдол  С нь 2000 онд төрсөн ял эдлэхээсээ өмнө мөн Баянхонгорт амьдарч, мал маллаж байжээ. Тэрээр шүүхээс 2 жил 8 сарын хорих ял авсан, оргох үедээ улбар шар өнгийн куртик, улаан өнгийн футволк, улаан шар өнгийн өмд, түрүүтэй хар гутал, ногоон саарал өнгийн саравчтай малгайтай байсан.

Хоригдлууд энгийн хувцастай явж байх магадлалтай учир ард иргэдийг сонор сэрэмжтэй байхыг анхааруулж байна.

Ташрамд, Хорих 423 дугаар ангийн даргаар өдгөө хурандаа Б.Түвшинтөгс ажилладаг аж. Бид мэдээллийн мөрөөр  эргэн мэдээлнэ.