Хямралын хүнд үед бизнесээ эхлүүлж, аварч үлдэж чадсан жинхэнэ ЖДҮ эрхлэгчид ярьж байна.

“Барилгын материалын худалдааны төвд хувцасны урлан нээчихсэн, хүмүүс урдуур, хойгуур явах бүртээ жиг жуг гээд л. Би яг шилэн хоргон дотор байгаа загас шиг л, бүлтгэнэн суудаг байлаа гэж Жанна ярилаа. Урлангаа байгуулаад удаагүй байтал нь “Ковид-19” цар тахал дэлхий даяар дэгдэв. Бүх бизнесүүдэд тохиолдсон гэнэтийн цохилтод тэр өртжээ. БНХАУ-д мэдлэг боловсрол эзэмшиж, түүнийхээ хэргийг гаргахаар эх орондоо баяр хөөр болон ирсэн түүнийг хүсэн хүлээсэн шиг нь таатай байдал угтсангүй.

“Одоо яах вэ, би юу хийх вэ” гэсэн асуулттай өдөр бүр тулгарч, гэртээ хамаг юмаа зөөж авчирсан тэрээр гэрээрээ оёдол хийх гэж үзжээ. Гэвч хүн бүр хөл хориотой байсан тул оёмол бүтээгдэхүүн авдаг нь тун ховор. Тиймээс давхар онлайн бизнес эхлүүлэхээр шийдэж, хүмүүсээс бэлэн барааны захилга авч, хүргэлтээ ч өөрөө хийдэг болжээ. Яг энэ үедээ Жанна осолд орж, хөлөө хугалсан байна. Энэ түүний хувьд "Өөрийгөө өрөвдөж, хайрласан" хамгийн хэцүү байсан үе нь гэнэ.

“Нэг хөлөө хугалсан ч суга таяг тулаад, маскаа зүүгээд, үүргэвчээ үүрээд байрны зээл, дэлгүүрийнхээ түрээсийг өгөхийн тулд бараа хүргэлтдээ гардаг байлаа. Үйлчлүүлэгчдэдээ учир байдлаа хэлээд захиалсан бараагаа гарч ирээд авч болох уу гээд л. Тийм байдалтай хүргэлтээ хийж явсаар хөл хорионы ард гарсан. Хүн өөрөө хичээвэл бүх зүйл болдог юм билээ” гэж Жанна хэлэв.

Ковидын хүнд үед түүн шиг олон залуус бизнесээ ингэж авч үлдсэн. Амьдралаа ингэж хамгаалсан. Хэдий ковидын тархалт одоо намжиж байгаа ч цар тахлаас үүдэлтэй дэлхийн эдийн засгийн хямрал, Монгол Улсын гадаад, дотоод нөхцөл байдал, үнийн өсөлтөөс үүдэн тэд туйлдсан хэвээр байна.

Бүх нийтийн хөл хорио тавигдмагц Жанна зорьсон ажлаа үргэлжлүүлэхээр урлангаа өөр газарт нүүлгэн, дахин ажлаа эхэлсэн. Гэсэн ч ажилтан авч, цалинжуулахаас эхлээд асуудлууд ар араасаа гарсаар байв. Үйлчлүүлэгчид үлдэгдэл мөнгөө өгөхгүй байх тохиолдол ихсэж, компани нь санхүүгийн асуудалд орж, бараа материалаа ч авч чадахгүйд хүрчээ. Бүх данс нь улайж, халаас, түрийвч нь хоосон өдрүүд түүнд энэ мэт олон тохиолджээ. Асуудал бүхний ард боломж хийгээд гарц байдгийг Жанна мэдэх тул шийдэл олж, гэрээр оёдол хийдэг эмэгтэйчүүд, ээжүүдтэй хамтран ажиллаж, тэднийг тоног төхөөрөмжөөр ээлжлэн хангасаар урлангаа хэвийн ажиллуулж чаджээ.

Барилгын материалын зах доторх жижиг шилэн "хорго"-ноос бизнесээ эхэлсэн түүний урлангаас одоо ““Janna”, “Davidorish” гэсэн хоёр шинэ брэнд төрөн гарчээ.

Хүнд бэрх цагт ч хүсэл мөрөөдлийнхөө төлөө шантрахгүй тэмцэж, асуудлаа шийдэж чадсан Бадрахын Жанна ШУТИС-ийн Үйлдвэрлэл технологийн сургуульд хувцасны дизайнер мэргэжил эзэмшиж, дараа нь БНХАУ-ын Шанхай хотод загвар судлалаар магистраа хамгаалжээ. Тэр дундаа материалын хээ урлалаар дагнан мэргэшиж, түүнийгээ эх орондоо суурьшуулж, хөгжүүлэхээр зүтгэж буй нь энэ юм.

ПОДВАЛЫН ГУТАЛЧИН, ОЁДОЛЧИН ГЭДГЭЭСЭЭ ИЧИХ ХЭРЭГГҮЙ. ТА БОЛ БАЯЛАГ БҮТЭЭГЧ

“Алийн болгон бид Эрээнээс цоохор даавуу авч ашиглах юм бэ. Хэдий болтол бид Туркээс эрээн даавуу авч гоёх юм бэ. Бид өөрсдөө түүхий эд дээрээ үндэсний онцлог шингэсэн, дахин давтагдашгүй хээтэй материал бүтээж чадна. Үүнийг би өөрөө бүтээж, харуулж байгаа. Илүү сайн хөгжүүлж, хүмүүст ойлгуулахын тулд жижиг дунд үйлдвэрлэл эрхлэгчидтэй хамтарч ажиллаж байна. Уулзалт семинаруудад оролцож, үгээ хэлж, салбарынхаа дуу хоолой болж яваа. Монголд гуталчин, оёдолчин маш их хэрэгтэй. Оёдолчин, гуталчин гэхээсээ огт ичих хэрэггүй. Дизайнерууд болон аливааг бүтээдэг хүмүүсийн авьяас, хүч хөдөлмөр бол газар дээрх баялаг юм. Газар доорх баялгаараа газар дээрх баялгаа санхүүжүүлдэг болох хэрэгтэй. Тэгсэн цагт Монгол Улс хөгжих болно. Подвалын оёдолчдоо төлөөлж, төрд хэлэхийг хүсдэг үг минь” хэмээн залуу бизнес эрхлэгчийн хувиар үзэл бодлоо хуваалцсан юм.  

Жанна одоогоор байгууллагын логогоор хээ бүтээж, брэнд ялгарал бүхий хувцсыг нь бүтээж өгөх ажлыг түлхүү хийж байгаа ажээ. Дан ганц хувцас гэлтгүй зохион бүтээсэн хээгээрээ ханын хээтэй цаас, /обой/ хөшиг, ажилчдын хувцас, цүнх зэрэг бүхий л брэнд хэрэглэгдэхүүнийг нь захиалгаар урлаж өгдөг байна. Мөн хувь үйлчлүүлэгчдийн биеийн онцлог, дүр төрхөд зориулж, имидж бүрдүүлэлтийн зөвлөгөө өгч, тохирох хувцсыг нь урлаж өгдөг ажээ.

Жанна энэ бүхнийг анх нэг сая төгрөгөөр эхэлсэн. 

Хүмүүс маш их мөнгө зарцуулна хэмээн мөрөөдлөө биелүүлэхээ хойш тавьдаг. Гэтэл би логоноос эхлээд бүгдийг нь өөрөө бүтээж, аавынхаа өгсөн нэг сая төгрөгөөр түрээсээ төлчхөөд ажлаа эхэлж байлаа. Энэ урланд байгаа бүх зүйл миний бүтээл. Бүх зүйлээ бэлдээд, зоригтой эхлэх хэрэгтэй. Ажил эхлээд бизнесийн орлого орж ирэх үед бага багаар тоног төхөөрөмж, шаардлагатай зүйлсээ нэмж авсаар болдог юм. Дизайнеруудын хувьд бүр ч их мөнгө хэрэггүй. Бид өмдний түрий хасаад л хоолоо олоод идчихдэг хүмүүс. Оюун санаандаа бүтээсэн бүх зүйлээ цаасан дээр урлаад, ажлаа эхэлж болно” хэмээн бизнесээ зориглон эхэлсэн түүхээ ярьсан юм.

“Эхлэл бол амжилттай бизнесийн 50 хувь гэдэг. Бусад нь зоригтой, тууштай байхад аяндаа болно. Асуудалгүй бизнес гэж үгүй. Хувийн бизнес эрхлээд баяждаг, томордог гэж хүмүүс боддог. Гэтэл өдөр бүр асуудалтай учирч, стресстэж байдаг. Харин ийм үедээ баярлах шалтгааныг өөртөө бий болгож чаддаг байх хэрэгтэй.

Бараа бүтээгдэхүүнийхээ хайрцаг, сав баглаа боодлоос эхлээд чанарыг эрхэмлэж, үйлчлүүлэгчдэдээ сэтгэл ханамжтай үйлчилгээ үзүүлж чадвал асуудлаа давж гарах өдөр ирдэг юм”. Тэр ингэж зөвлөлөө. Түүний энэ үг шинээр бизнес эхлэхээр төлөвлөж буй, мөн эхлээд мухардсан хүмүүст зориулсан "өдөөлт" шиг байв. Эдийн засаг хямарсан ч зах зээлийн цоорхой, нийгмийн өөрчлөлтийг мэдэрч, зоригтойгоор бизнесээ эхлүүлж, хүнд үеүдэд ч шүд зуун тэсч чадвал амжилтад хүрч болдгийг Жаннагийн түүхээс харж болох ажээ.