Хариуцлага, журамгүй байдал дахин давтагдсанаас цэргийн алба хаагч амиа алдав. Өмнөгөвь аймгийн Зэвсэгт хүчний 167 дугаар ангийн хугацаат цэргийн албан хаагч 19 настай Н нь 2022 оны долоодугаар сарын 13-нд барилгын хажуунаас нас барсан байдалтай олдсон харамсалтай хэрэг гарсан.

Талийгаач Н-ыг наадмын өдөр буюу долоодугаар сарын 11-нд мод үрсэлгээ, газар шорооны ажилд нэгэн хувийн компани ажиллуулахаар авч явсан байна. Ингэхдээ ангиас ажил хийлгэхээр гаргахдаа ямар нэгэн зөвшөөрөлгүйгээр явуулжээ. Цэргийн амиа алдсан газраас цустай хутга илэрсэн ба үүнийги нь эд мөрийн баримтаар хураан авч шүүх шинжилгээнд өгсөн байдаг. Одоогоор шинжилгээний дүгнэлт гараагүй байна.

Түүнчлэн талийгаач барилгын хашааны банзыг хуулан авч, ганцаараа барилга руу орж байгаа нь камерт үлдсэн байна. Уг хэрэгтэй холбогдуулан талийгаачийн найз охиноос дуудаж мэдүүлэг авчээ. Ингэхэд тэд хоорондоо маргалдсанаас үүдэн, талийгаач амиа насаа егүүтгээгүй гэдгийг хууль хяналтынхан тогтоогоод буй.

Тиймээс Ангийн захирагч Ж.Амаржаргал, Штабын дарга З.Баяраа, Галтууд ХХК-ийн захирал Б.Баярчимэг, түүний нөхөр н.Баяраа болон бусад албан тушаалтнуудыг холбогдуулан шалгаж байна гэж ЦЕГ-аас мэдээллэв.

Эр цэргийн албанд эх орноо хамгаалах иргэний үүргээ биелүүлэхээр явсан аавын хүү, ээжийн үр хэн нэгэн даргын халаасыг түнтийлгэж, бусдын боол зарц болох ёсгүйг санах хэрэгтэй. Бүр цаашлаад дайны бус энхийн цагт цэргийн дотоод харгислал, яргаллаасаа хальж, хууль бусаар хөдөлмөр эрхэлж байгаад энэ мэт амиа алдаж буй нь дэндүү харамсалтай.

Талийгаачийг зөвшөөрөлгүй, цэргийн ангиас ажил хийлгэхээр гаргаагүй байсан бол гуравхан сарын дараа албаа нэр төртэйгээр хаагаад, гэртээ харих байлаа.  

Нэхэн сануулахад, 2019 оны зургаадугаар сарын 18-ны өдөр Өмнөговь аймгийн 167 дугаар цэргийн ангид харуулд гарч байсан 19 настай байлдагч Б буудуулсан хэрэг гарч байсан. Бууны сум байлдагчийн цээжний баруун хэсгээр нэвт гарсан бөгөөд шархадсан байлдагчийг Цэргийн төв эмнэлэгт авчирч хэвтүүлэн эмчилж, азаар амьд гарсан юм.

Энэ мэт хариуцлагагүй байдал давтагдаж, алба хаагчийн эрүүл мэнд цаашлаад амь нас хохирсоор байх уу?