Улсын наадам болоход сар гаруйхны хугацаа үлдээд байна. Өнгөрсөн жилийн наадмын түрүү, улсын аварга Э.Оюунболдоос допинг илэрч, цолыг нь хураах шийдвэр гарсан ч тэр Үндэсний бөхийн хорооны уг шийдвэрийг эсэргүүцэж, шүүхээр заргалдаж байгаа билээ.
Өмнөх шүүх хуралдаан нь өнгөрсөн тавдугаар сарын 22-нд зарлагдсан боловч шүүх танхимд Э.Оюунболд өөрийн биеэр ирэлгүй өмгөөлөгчөө явуулсан билээ. Харин өмгөөлөгч нь “Нэхэмжлэгч Э.Оюунболдтой өмгөөллийн гэрээгээ өнөөдөр байгуулсан тул хэргийн материалтай танилцах шаардлагатай” гэсэн шалтгаанаар шүүх хурлыг хойшлуулах хүсэлт гаргасан юм. Энэ мэт шүүх хуралдаан хоёр ч удаа хойшилсоор өнөөдөр буюу зургадугаар сарын 17-ны өдөр 10 цаг болхоор товлогдсон байсан.
Гэвч Э.Оюунболд өнөөдөр /2020.06.17/ шүүх хуралдаанд ирээгүй бөгөөд түүний өмгөөлөгч улсын аварга Э.Оюунболдтой холбоотой асуудал АТГ-т шалгагдаж байгаа учраас тухайн хэргийн давхцуулж захиргааны хэргийн шүүхэд шүүх шаардлагагүй учраас энэ хэргийг түдгэлзүүлж өгнө үү гэсэн хүсэлтийг шүүх бүрэлдэхүүнд гаргасан ч шүүх бүрэлдэхүүн уг хүсэлтийг хэлэлцээд, тухайн хүсэлтийг хэрэгсэхгүй болгож шийдвэрлэснээр шүүх хурал үргэлжилж байна.
