Төрийн банк Чингэлтэй дүүргийн долдугаар хорооны нутаг, Зурагтын шинэ эцэст байрлах Төрийн банкны АТМ-аас 50 гаруй сая төгрөг хулгайд алдагдсан хэрэг өнгөрсөн оны есдүгээр сард гарч байв. Уг хэргийг цагдаагийн албан хаагчид жил гаруй мөрдөн байцаалтын ажиллагаа явуулсаны эцэст мөнгө хулгайлсан гэмт этгээдийг илрүүлэн шалгаж байна. Тодруулбал, Төрийн банкны ажилтан 36 настай Д гэгчийг тус хэрэгт холбогдуулан Чингэлтэй дүүргийн цагдаагийн нэгдүгээр хэлтэст шалгаж байгаа ажээ.
Төрийн банкны ажилчид ийнхүү харилцагчдын мөнгө рүү халдаж байгаа олон нийтэд ил болсон хоёр дахь хэрэг юм.
Мөн өнгөрсөн жил гарсан нэгэн хэргийг эргэн сануулбал, Төрийн банкны “Барс” салбарын теллер Д гэгч нь өндөр настай нэгэн хадгаламжиндаа мөнгө хийхээр ирэхэд нь тухайн иргэнийг хууран мэхэлж, давхар зарлагын баримт дээр түүгээр гарын үсэг зуруулж хадгаламжинд нь байсан 5 сая төгрөгийг хувьдаа завшсан байж болзошгүй хэргийг Баянгол дүүргийн цагдаагийн 1 дүгээр хэлтэс шалгаж байсан юм.
Харин эдгээр хэргүүдийн талаар Төрийн банкнаас тодруулахад “Хэрэг цагдаагийн байгууллага шалгаж байгаа учраас манайхаас ямар нэгэн хариу, тайлбар өгөх боломжгүй байна” гэв.
