“Чингис хаан” банк нь 2001 оны тавдугаар сарын 18-ны өдөр байгуулагдсан. Монгол Улсын анхны гадаадын хөрөнгө оруулалттай банк байсан бөгөөд 2015 оноос 100 хувь үндэсний хөрөнгө оруулалттай банк болон өөрчлөгдөн үйл ажиллагаагаа явуулж эхэлсэн байдаг.
ҮЙЛ АЖИЛЛАГАА ДОГОЛДОХ УЧИР...
Эрүүл мэндийн даатгалын ерөнхий газрийн дарга Ч.Алтанхуяг нь албаны эрх мэдлээ урвуулан ашиглаж, Эрүүл мэндийн даатгалын сангийн 30 тэрбум төгрөгийг ”Чингис хаан” банкинд байршуулсан. 2017 оноос эхлэн 15.2 хувийн хүүтэй “Чингис хаан” банкинд байршуулж эхэлсэн ба мөнгөний хүүг 2018 оны нэгдүгээр сард 5.5 хувь болгосноор хүү нь 1.6 тэрбум болж байсан. Гэсэн ч дахин хоёр сарын дараа зургаан хувийн хүүтэй байхаар нэмэгдүүлжээ. Энэ үйлдлийнхээ хариуд Ч.Алтанхуяг нь "Чингис хаан" банкнаас 2019 оны дөрөвдүгээр сарын 30-наас наймдугаар сарын 31 хүртэлх хугацаанд нийт 86.2 сая гаруй төгрөг бэлнээр авсан нь урьдчилсан байдлаар тогтоогдсон. Эдгээр үйлдлүүд нь АТГ-т шалгагдах гол нөхцөл болсон юм.
Энэ гэрээ нь хуулийн дагуу хийгдсэн гэж байгаа боловч 30 тэрбум төгрөгийг тус банкинд байршуулах гэрээ нь төрийн албан тушаалтанд авлига өгөх замаар өөрсдөдөө давуу байдал бий болгосон “Чингис хаан” банкны гүйцэтгэх захирал С.Сандагдоржийг, мөн ЭМДЕГ дарга Ч.Алтанхуяг нарыг АТГ-аас эрүүгийн хэрэг үүсгэн шалгаж, яллах дүгнэлтийг Нийслэлийн прокрорын газар руу явуулсан боловч ”COVID-19” вирусийн анхны тохиолдол илэрснээс болж бүх шүүх хурлыг энэ сарын 16-ны өдөр хүртэл хойшлуулаад байсан юм. Харин “Чингис хаан” банкийг Эрүүгийн хуулийн 22.5.3 дахь хэсэгт заасан “Хахууль өгөх гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг тодорхой төрлийн үйл ажиллагаа явуулах эрх хасч, нэг зуун хорин мянган нэгжээс дөрвөн зуун мянган нэгжтэй тэнцэх хэмжээний төгрөгөөр торгох ял шийтгэнэ” хэмээн заасныг үндэслэн яллагдагчаар татсан байна. Хэргийг авилгалтай тэмцэх газарын мөрдөгчид хуулийн дагуу шалгаж дуусаад яллах дүгнэлт үйлдүүлэн шүүхэд шилжүүлэх саналтай Нийслэлийн прокурорын газарт хүргүүлжээ. Хяналтын прокурор хавтаст хэрэгтэй танилцаад хэргийн бүрдэл хангагдсан гэж үзвэл ирэх сард багтаан шүүхэд шилжүүлэх бололтой. С.Сандагдорж нь 2012-2014 онуудад Хөгжлийн банкны дэд захирлаар ажиллаж байгаад 2017-оос “Чингис хаан” банкны гүйцэтгэх захирлаар ажиллаж байсан юм. Энэ хэрэгтэй холбогдуулан эд хөрөнгийг битүүмжлэх ёстой ч одоогоор “Чингис хаан” банкинд нийгмийн даатгалын 30 тэрбум төгрөг эргэлдсээр буй.
“COVID-19” ВИРУСИЙН ХАЛХАВЧИН ДООР БАНКУУД АРАЙ ЯДАН АЖИЛЛАЖ БАЙНА
Өнгөрөгч 2019 оноос эхлэн “Чингис хаан” банкны үйл ажиллагаа нь эрчимтэй доголдон харилцагчдынхаа хугацаа дууссан хадгаламжийг өгөхгүйгээр удах, сунжруулах, ажилчидаа урт хугацаагаар амраах, гадагш мэдээлэл дамжуулахгүй байх зэргээр “аргалж” байна. “Чингис хаан” банкны хоёр салбар /Төв салбар Баянгол зочид буудлын урд, Орос элчингийн эсрэг талд / байрлах салбарууд одоогоор 09:00-12:00 цагийн хооронд ажиллаж байна. “Чингис хаан” банк дампуурах эрсдэлд хүрсэн ч “COVID-19” вирусийн халдвараас урьдчилан сэргийлэх нэрийн дор хэмнэлт хийж, өнөө маргаашийг аргалж байгаа талаар эх сурвалжууд ярьсан юм.
