“Ковид-19” цар тахлаас урьдчилан сэргийлэх бүх нийтийн бэлэн байдлын зэрэгт шилжсэн энэ үед зам тээврийн осол, зөрчлийн нөхцөл байдлын талаар Сонгинохайрхан дүүрэг дэх Замын цагдаагийн хэлтсийн зохицуулагч, цагдаагийн дэслэгч Г.Далайжаргалаас тодрууллаа.
Бүх нийтийн бэлэн байдлын зэрэгт шилжсэн хугацаанд зам тээврийн осол бүртгэгдсэн байдлын талаар мэдээлэл өгнө үү?
Коронавирус /Ковид-19/ өвчний тархалтыг саармагжуулж, урьдчилан сэргийлэх зорилгоор иргэдийн хөдөлгөөнийг хязгаарлаж, цагдаагийн байгууллагын бие бүрэлдэхүүн бүх нийтийн бэлэн байдлын зэрэгт ажиллаж байна. Цар тахал өвчний үед хүн болгон хариуцлагатай байж, халдвар хамгааллын дэглэмийг сахихгүй бол нэг л хүн хариуцлагагүй байдал гаргаснаас болж өдийг хүртэл хорио цээрийн дэглэм сунгагдсаар байгаа. Сонгинохайрхан дүүргийн нутаг дэвсгэрт 2021 он гарснаас хойш 7 хоногийн хугацаанд ноцтой зам тээврийн ослын улмаас нэг хүн амь насаа алдлаа. Мөн дүүргийн алслагдсан замуудад тээврийн хэрэгслийн хурд хэтрүүлэх, согтууруулах ундааны зүйл хэрэглэсэн үедээ тээврийн хэрэгсэл жолоодох зөрчил гарсаар байна. Тухайлбал, Сонгинохайрхан дүүргийн 22 дугаар хороонд согтуугаар тээврийн хэрэгсэл жолоодож замын хөдөлгөөнд оролцож зам тээврийн осол гаргасан гурван тохиолдол бүртгэгдсэн.
Согтуугаар тээврийн хэрэгсэл жолоодох байдал энэ үед ч буурахгүй байна уу?
Согтуу жолооч хөдөлгөөнд оролцохдоо баримжаалах чадвараа алддаг, самбаачлах хугацаа нь ихсэх буюу сүүлд нь гарах сөрөг үр дүнг тооцоолж чадваргүй болдог. Түүнчлэн иргэд зөрчил гаргасан тохиолдолд хүлээлгэх хариуцлагыг мэддэг ч хайхрамжгүй хандаж зам тээврийн осолд холбогдсоор байгаа нь ухамсар, ёс зүйтэй холбоотой гэж хэлж болно. Цагдаагийн байгууллагын алба хаагчийн үүрэг гүйцэтгэж байгаа газар замын хөдөлгөөний дүрмийг сахин биелүүлээд байхгүй газар үргэлж зөрчдөг, торгуулахгүй л бол болоо гэсэн мунхаг сэтгэхүйгээр хандсанаас болж хор уршигт автаж хохирч, бусдыг хохироож байгаагаа ойлгож хариуцлагатай байх шаардлагатай байна. Цас орж, хүйтний эрч чангарч байгаатай холбоотойгоор автозамын зорчих хэсэгт халтираа гулгаа үүссэн. Тус дүүрэг дэх замын цагдаагийн хэлтсээс Нийслэлийн хот тохижилтийн газар болон хот тохижилт хариуцсан байгууллагуудтай хамтран давс, бодис цацах ажлыг хийж байгаа хэдий ч зуны дугуйтай хөдөлгөөнд оролцож осол гаргах тохиолдол байгаа юм. Тиймээс иргэдийг тээврийн хэрэгсэлийн техникийн бүрэн бүтэн байдлыг хангаж замын хөдөлгөөнд оролцож дор бүрнээ хариуцлагатай байж өөрийн болон бусдын аюулгүй байдлыг хангаж замын хөдөлгөөнд соёлтой оролцохыг уриалж байна.
