УИХ-ын гишүүн Ц.Туваан өөрийгөө дарга,С.Эрдэнэ ч дарга хэмээж намын даргын тамганы маргаан өрнөж байгаа аж.
Тэрээр хэвлэл мэдээлэлийн хэрэгслээр урьд өмнө нь удаа дараа “...намын даргын суудалд би санаархаагүй. Та санаа зоволтгүй С.Эрдэнэ даргаа. Би дараагийн даргад тамгыг нь өгнө. Би зүгээр хадгалж байгаа” гэж мэдээллэж байснаа өөрт нь байсан тамгыг хүчингүй болгосон тухай мэдээ гарч эхэлмэгц гэнэт өөрчлөгдөн “Би жинхэнэ дарга нь байна. Миний тамга хүчинтэй” хэмээн сандал ширээгээ булаацалдан хөгөө тарьж эхлэн Улсын бүртгэлийн Ерөнхий газарт “тамгаа авъя” гэж гомдол гаргасан байна. Ц.Тувааны увайгүй үйлдэл дарамт шахалтанд орж, аргаа барсан Улсын бүртгэлийн Ерөнхий газрын дарга Д.Дэлгэрсайхан Улсын дээд шүүх рүү “Ардчилсан намын хууль ёсны намын дарга нь одоогийн байдлаар хэн гэдэг хүнийг шүүх бүртгэж баталгаажуулсан болохыг хэлж өгөөч” гэсэн утгатай албан тоот илгээжээ.
АН-ын дүрмээр бол намын даргын сунгаа зарлагдаж өрсөлдөн гишүүдийнхээ олонхийн саналыг авсан хүн намын даргаар сонгогдсоноо баталгуужуулж намын Их хурлаар ордог байна. Хамгийн сүүлд Ардчилсан намын хууль ёсны даргаар 2017 оны 02 дугаар сарын 12-ны өдөр намын 7 дугаар Их хурлын 03 дугаар тогтоолоор С.Эрдэнэ сонгогдсоныг нэгэн дуугаар баталгаажуулсан юм байна. АН-ын 7 дугаар Их хурлын энэхүү 03 тоот тогтоолыг УДШ-ийн 2017.03.15-ны өдрийн хуралдааны 01 тоот тогтоолоор бүртгэж, Улсын бүртгэлийн ерөнхий газраас гэрчилгээнд тэмдэглэл оруулж С.Эрдэнэ намын дарга хэмээн бүртгэн баталгаажуулсан байна. Эрх бүхий байгууллагуудаас гаргасан эдгээр тогтоол шийдвэрүүд өнөөдрийг хүртэл хүчин төгөлдөр хэвээрээ байгаа юм.
Харин Улсын Дээд Шүүхийн хэн нэг шүүгч, албан тушаалтан шүүхийн цахим мэдээлэлийн санд 2020.11.05-ны өдөр намын дарга гэсэн цэсний ард намын даргын үүрэг гүйцэтгэгч Ц.Туваан гэсэн намын үндсэн дүрмэнд нь байхгүй албан тушаалд түүнийг томилон сэмхэн тэмдэглэсэн байсан нь өнөөдөр илэрч, ширүүхэн маргааныг эхлүүлжээ.
Энэхүү АН-ын даргын тэмдэглэлд өөрчлөлт оруулах гэмт үйлдлийн ард одоогийн ерөнхийлөгч Х.Баттулга байгаа төдийгүй “Салхитийн мөнгөний ордын хэрэг” гэгч дуулиант хэргээр дээд шүүхийн иргэний хэргийн шүүгчдийн эрхийг хасч айлгасан сүр хүчнийхээ нөлөөгөөр УДШ-ийн цахим санд өөрийн гар хөл болсон аль нэг шүүгчээр өөрчлөлт хийлгэсэн байж болзошгүй гэсэн хардлага хэсэг бүлэг хүмүүст бий болсон байна. Хэрвээ төрийн мэдээлсэнд хууль бусаар халдсан болох нь тогтоогдвол тухайн буруутай этгээд Эрүүгийн хуулийн 26.1.4.3 дахь хэсэгт заагдсанаар 5-12 жил хоригдох ялаар шийтгүүлэх хүнд ялтай юм байна.
Ингээд УБЕГ-ын дарга Д.Дэлгэрсайханы өгсөн мэдэгдэлд өгөх хариуг Улсын дээд шүүх хүчин төгөлдөр тогтоолоо баримтлах уу эсвэл цахимд өөрчлөлт хийгдсэн тэмдэглэлийг үндэслэж намын даргыг хэн болох тухай хариу өгөхийг Ардчилсан намын мянга, мянган гишүүд сонирхон хүлээж байна.
