Хан-Уул дүүргийн цагдаагийн нэгдүгээр хэлтэст Хууль зүй, дотоод хэргийн сайд Х.Нямбаатарыг Эрүүгийн хуулийн 13.14 дэх заалтаар гэмт үйлдэл үйлдсэн эсэх асуудлаар шалгаж байгаа аж.
13.14 дүгээр зүйл. Худал мэдээлэл тараах
1.Хүний нэр төр, алдар хүнд, хуулийн этгээдийн ажил хэргийн нэр хүндэд халдсан илт худал мэдээллийг олон нийтэд тараасан бол дөрвөн зуун тавин нэгжээс нэг мянга гурван зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас гурван сар хүртэл хугацаагаар зорчих эрхийг хязгаарлах ял шийтгэнэ.
Тодруулбал, МУСТА, жүжигчин Б.Навчаа Х.Нямбаатар сайдыг дээрх хуулийн заалтыг зөрчсөн гэх үндэслэлээр цагдаагийн байгууллагад гомдол гаргажээ. Энэ талаар жүжигчин Б.Навчаа 2020.12.21-ний өдөр мэдээлэл хийсэн байна. Тэрээр мэдээлэлдээ Хууль зүй, дотоод хэргийн сайд Х.Нямбаатар 2020.12.15-ны өдөр NTV телевизийн “Улаан бал” нэвтрүүлэгт зочноор оролцохдоо “..Миний талаар гүтгэлэг тараасан Б.Навчаа гэдэг хүүхэн чинь 14 настай хүүхэд хүчиндэгч муу Х.Нямбаатар новш зайлаа чи...” гэж хэлсэн хэмээн миний хэлээгүй, бичээгүй үгийг хэлсэн, бичсэн мэтээр илт, худал мэдээлэл тараасан. Мөн өнгөрсөн сонгуулийн үеэр АН-аас нэр дэвшсэн Д.Батбаяр нэр дэвшигчийн штабд ажиллаж, иргэдэд бэлэн мөнгө тараасан гэж гүтгэсэн. Тийм учраас хуулийн байгууллагад шалгуулахаар гомдол гаргасан гэсэн байв.
Угтаа бол жүжигчин Б.Навчаа нь Х.Нямбаатар сайдыг гүтгэсэн гэх үндэслэлээр 2020.06.13-ны өдрөөс эхлэн хуулийн байгууллагад шалгагдаж эхэлсэн. Түүний ийнхүү хуулийн байгууллагаар шалгуулж, яллах дүгнэлт хүртэл үйлдүүлэх болсон нь өөрийн фэйсбүүкдээ байршуулсан постноос /нийтлэл/ эхлэлтэй.
Ийнхүү 2020.04.26 өдөр жүжигчин Б.Навчаа өөрийн фэйсбүүк хуудаснаа нийтэлсэн постонд Х.Нямбаатар сайд гомдож түүнийг цагдаагийн байгууллагаар хагас жил шалгуулжээ. Одоо ч мөн Чингэлтэй дүүргийн цагдаагийн нэгдүгээр хэлтэст шалгуулж байгаа юм байна. Энэ талаар МУСТА, жүжигчин Б.Навчаагаас тодруулахаар утсаар холбогдоход “...хэрэг шийдвэрлэгдтэл би ярилцлага, мэдээлэл өгөх боломжгүй...” гэж ярилцахаас татгалзсан юм.
Харин өөр нэг эх сурвалжийн мэдээлснээр Чингэлтэй дүүргийн цагдаагийн хэлтэст Х.Нямбаатар сайдын гомдлоор 2-3 иргэнийг мөн шалгагдаж байгаа аж.
Х.Нямбаатар сайдыг гүтгэсэн гэх үндэслэлээ Чингэлтэй дүүргийн Эрүүгийн хэргийн анхан шатны шүүхээс торгуулах ял шийтгүүлсэн сэтгүүлч Х.Ганзаяагийн хэргийг дахин сануулъя.
www.murch.mn сайтын сэтгүүлч Х.Ганзаяа насанд хүрээгүй хүүхэдтэй бэлгийн харилцаанд орвол 450 мянган төгрөгөөр торгох хуулийн заалтыг эсэргүүцэж фэйсбүүкдээ пост оруулжээ. Өөрөөр хэлбэл сэтгүүлч Х.Ганзаяа бус иргэн Х.Ганзаяа олон нийтийн сүлжээн дэх орон зайдаа Үндсэн хуулиар олгогдсон эрхээ эдэлсэн аж. Гэвч түүнд Х.Нямбаатар сайд гомдоод хуулийн байгууллагаар шалгуулаад шүүхээс торгох ял оногдуулсан байдаг.
