Дархан-Уул аймагт үйл ажиллагаагаа явуулдаг Мах Сервис ХХК-ийн буузнаас шавьж гарч ирсэн талаар нэг иргэн цахим хуудастаа мэдээлж, сэрэмжлүүлжээ.
-Буузыг хаяж өгөөд 30 мянган төгрөг аваарай гэсэн-
Асуудлыг мэдээлсэн иргэн М.Урантуяа "Ийм балиар юм гарж ирчээд байхад /аалз/ буузныхаа мөнгийг аваарай гээд байж байдаг. Заваарсан газар вэ?. Холбогдох байгууллага нь шалгаач ээ гэж хэлэхээр "Та нар гүтгээд байгаа юм биш үү" гэж хэлээд утсаа авахаа байчих юм. Буузыг нь нохойдоо хаяж өгөөд, 30 мянган төгрөг ирээд аваарай гэх юм. Арай юу?
Монголд байхгүй аалзыг хаанаас авч ирээд, хэн албаар ингээд чихээд сууж байх юм бэ. Үнэн болоод л анхааруулж байна. Чийг хөгз мөөгөнцөр ихтэй байгаагийн л жишээ биз дээ. Байнга авж идээд байдаггүй ч яарч сандарсан, завгүй үед бэлэн бүтээгдэхүүн авж идэцгээдэг болхоор анхааруулмаар байна. Адилхан үйлдвэр, үйлчилгээний байгууллагууд анхаарна биз" хэмээжээ.
Түүнээс энэ тухай тодруулах гэхэд "Одоогоор завгүй байна" гэв. Удахгүй бид түүний байр суурийг хүргэх болно.
-ААЛЗ БУУЗ РУУ ОРОХ ЯМАР Ч БОЛОМЖГҮЙ-
Харин бид энэ асуудлын мөрөөр "Мах сервис" ХХК-ийн Гүйцэтгэх захирал Д.Доржхорлоотой холбогдоход "Тухайн иргэн баримт байхгүй байсан. Бараг 14 хоногийн өмнө ийм асуудал ярьж, манай үйлдвэрээс сая төгрөг нэхэмжилсэн. Бид шууд мэргэжлийн хяналтын газарт баримтаа хүлээлгэж өгөөд шинжлүүлэх шаардлага тавьсан. Манай үйлдвэрийн хувьд эрүүл ахуйн стандарт шаардлагыг хангаж ажилладаг. Тиймээс аалз бууз руу явж орох ямар ч боломжгүй. Өнөөдөр аймгийн Мэргэжлийн хяналтын газраас махнаас дээж авч, лаборторийн шинжилгээ хийсэн. Удахгүй хариу нь гарах байх. Хэрвээ баримтаар нотлогдоод асуудал гарсан байвал бид хохирлыг нь барагдуулна" гэж байр сууриа илэрхийллээ.