Хоёр долоо хоног орчмын өмнө Австралийн баруун хязгаарт үхлийн аюултай цацраг идэвхт бодис агуулсан жижиг сав тээвэрлэх замдаа гээгдсэн юм. Уул уурхайд ашиглах зориулалттай уг бодисыг 1,400 км урт замын хаа нэгтээ гээсэн гэж үзэж байгаа.

8 мм, 6 мм хэмжээтэй жижигхэн саванд 19 гигабеккерель хэмжээтэй цезий 137 элемент хадгалагдаж байжээ. Уг бодисыг нэгдүгээр сарын 12-нд баруун Австралийн Пилбара бүсийн нэг уурхайгаас ачааны автомашинд тээвэрлэн 16-ны өдөр Перт хотод хүргэсэн байна. Гэхдээ тусгай хамгаалалтын гадуур савыг нь 25-ны өдөр нээхдээ л бодис гээгдсэн болохыг мэдэж байжээ.

Тэр өдрөөс хойш орон нутгийн засаг захиргаа зам дагуу эрлийн ажиллагаа явуулсан ч олдоогүй байна.

Гээгдсэн бодис нь 30 жилийн турш гамма болон бета цацраг туяа ялгаруулах чадвартай. Уг бодист ойртоход арьс шууд түлэгдэх ба удаан хугацаагаар ойр байвал хорт хавдар үүсгэх эрсдэлтэй юм байна.

Бодисыг агуулсан саванд нэг метр ойртоход л 10 дахин их рентген туяанд нэг цагийн турш шаруулсантай тэнцэх тул олсон хүн даруй холдох ёстойг мэргэжилтнүүд анхааруулжээ.

Орон нутгийн эрх баригчид эрлийн ажиллагаагаа өргөжүүлж, Австралийн холбооны засгийн газраас цацраг туяа илрүүлэгч багаж төхөөрөмжүүдийг хүлээж авснаа өчигдөр болсон хэвлэлийн хурлын үеэр мэдээлсэн байна.

“Энэ бол маш хэцүү ажил. Уурхайгаас Перт хүртэл 1,400 км зайтай. Бид алдагдсан бодисыг олж чадахгүй ч байх магадлалтай” гэж Баруун Австралийн Онцгой Байдлын Албаны  ахлах мэргэжилтэн Дэвид Гилл ярьсан байна.

Холбооны засгийн газраас автомашины явдал дунд 20 метрийн радиус дотор цацраг туяаны эх үүсгүүрийг илрүүлэх чадвартай шинэ багаж хүлээж авснаа эрлийн ажилд ашиглаж эхэлснийг тэр мэдээлжээ.

Эх сурвалж: The Guardian